Политика

Бу сыл саҥатыгар Сахамин Афанасьев, Томтор баһылыга Алексей Винокуров, Өймөкөөн сэлиэнньэтин баһылыга Павел Васильев уонна «Теплоэнергосервис» салалтата буолан Томтор, Өймөкөөн, Биэрэк Үрдэ сэлиэнньэлэригэр саҥа хочуолунайдары уонна ититии ситимнэрин бырайыактаан тутуу боппуруостарыгар мунньахтаабыттара. Оттон бу күннэргэ ол мунньах түмүгүнэн үлэ-хамнас хайдах бара турарын, Ил Түмэн, бырабыыталыстыба өттүттэн туох эбии көмө наадатын дьүүллэстилэр.

«Теплоэнергосервис» АУо генеральнай дириэктэрэ Максим Трофимов Томтор сэлиэнньэтинэн бырайыак докумуона оҥоһулла илигин эттэ. «Ол да буоллар, тутуу миэстэтэ быһаарылынна. Бырайыактааһыны саҕалаары сир учаастагын сокуоннай күүһүгэр киллэриэххэ наада», - диэн эттэ Максим Трофимов.

«Теплоэнергосервис» инбэстииссийэҕэ уонна бас билиигэ управлениетын сүрүн исписэлииһэ Оксана Буракова эппитинэн, балаҕан ыйын 15 күнүгэр бигэргэтиллибит инбэстииссийэ бырагырааматынан Томторго хочуолунайы тутууга 18 мөл солкуобай көрүлүннэ. Сыл бүтүүтэ кыһыҥҥы суол аһылыннаҕына, оборудованиены атыылаһан аҕалыахтара. Оттон тутуу үлэтэ сайын саҕаланыахтаах.

Өймөкөөн муниципальнай тэриллиитин баһылыга Павел Васильев Биэрэк Үрдэ сэлиэнньэтигэр хочуолунай тутуутугар барыта бэлэмин эттэ. Быйыл турбалары, кырааннары уонна атын коммунальнай оборудованиены барытын атыылаһыахтаахтар. «”Теплоэнергосервис” тэрилтэни кытта таһаарыылаахтык үлэлэһиэхпит диэн эрэнэбин. Биэрэк Үрдэ олохтоохторун кытта мунньахтары ыыппыппыт. Ититии исхиэмэтин уо.д.а. докумуоннары саҥартыбыт, үлэ бара турар, салгыы даҕаны былаанынан үлэлээн иһиэхпит», - диэн иһитиннэрдэ Павел Васильев.

Томтор сэлиэнньэтин баһылыга Алексей Винокуров топосъемка ыытыллыбытын, ититии ситимэ саҥардыллан торумнаммытын эттэ. «Тутуу үлэтигэр бэлэм олоробут. 2023 сылга бу ититии ситимигэр 46 дьиэ холбонуоҕа. Биһигиттэн туох ирдэнэрин барытын оҥоруохпут. Тоҕо диэтэххэ, бу биһиэхэ «ыарыылаах» боппуруос буолла. Бырабыыталыстыба отчуотугар, улуус баһылыгын отчуотугар хаста да туруорулла сылдьыбыта. Онон бу үлэҕэ биһиги олус боччумнаахтык ылыстыбыт. Сыл саҕаланыаҕыттан Сахамин Милановичтыын бу боппуруоһу ырытан бэлэмнии сылдьабыт», - диэтэ Томтор баһылыга.

«Өр кэмҥэ харгытаан турбут үлэ быһаарыллан эрэр. Дьиҥнээх үлэ-хамнас саҕаланна. Сир учаастактарын биэрии, топонимическай устуу, атыылаһан ылыыга бэлэмнэнии оҥоһуллар. Томторго хочуолунай тутуута саҕаланна. Оттон Биэрэк Үрдүгэр хочуолунайы тутууга бэлэмнэнии үлэтэ ыытылла турар. Максим Макаровичка махтаныахпын баҕарабын, хампаанньата хочуолунайдары тутууга быһаарыммытын иһин. Сыл саҕаланыытыгар ыытыллыбыт сүбэ мунньаҕынан былааннаммыт үлэни эһиги толордугут. Онон улахан махтал! Сэлиэнньэлэр баһылыктарыгар хампаанньаҕа күүс-көмө буолуҥ диэн баҕа санаабын этэбин. Сир учаастактарын бэлэмнээһин, нэһилиэнньэни кытары үлэлэһии өттүгэр көмөлтөҕүт наада. Дьиэлэри ититиигэ холбоору сорох матырыйаалы миэстэтигэр ылар наада буолуо. Онон эһигиттэн көхтөөх кыттыһыыгыт ирдэниэҕэ. Биллэн турар, үлэ түмүгэр, Томтор уонна Биэрэк Үрдүн олохтоохторо кэтэспиттэрин курдук, микрооройуоннар ититии ситимигэр холбонуохтара. Бэлэмнэнии үлэтэ былаанынан барыта оҥоһулунна. 2023-24 сылларга чопчу былааннары торумнаатыбыт. Онон бу хайысханан салгыы үлэлээн иһиэххэ. Сири сокуонунан бигэргэтии, оборудаваниены атыылаһыы, дьиэлэри холбооһун уонна саамай сүрүнэ – нэһилиэнньэни кытта үлэ боппуруостара үөскүү туралларын тухары ырытыһан иһиэхпит. Кэллиэгэлэр, манан мунньахпытын түмүктүүбүт. Үчүгэй настарыанньаны, үтүө күнү, табыллыыны баҕарабын», - диэн түмүктээтэ Сахамин Афанасьев.

Мунньах кэнниттэн Сахамин Афанасьев «Ил Түмэн» хаһыакка балаһыанньаны сиһилии быһааран биэрдэ:

- Томторго «Рабочай» микрооройуонугар кииннэммит ититиитэ суох буолан, онно хочуолунайы тутуу боппуруоһа бырабыыталыстыбаҕа хаста даҕаны туруоруллубута. Сыл саҕаланыытыгар «Теплоэнергосервис» салалтатын кытта сүбэ мунньах ыыппыппыт. Кинилэр биһиги этиибитин ылынан хочуолунайы тутарга чопчу үлэлэһэн саҕалаабыттара. Инньэ гынан, «Рабочай» микрооройуон хочуолунайынан хааччыллан 48 дьиэ барыта хочуолунайга холбонуохтара. Бу оройуоҥҥа, сүнньүнэн, учууталлар олорор буоланнар, боппуруос сытыытык турбута. Кинилэр сарсыарда аайы оскуолаҕа бараллар, оттон Өймөкөөн улууһа кытаанах тымныытынан биллэр. Кыһын орто тэмпэрэтиирэлэрэ -50 кыраадыска тэҥнэһэр. Маннык тымныыга дьон оһох оттон олорор. Онуоха биһиги үөрүүбүтүгэр «Теплоэнергосервис» акционернай уопсастыба инбэстииссийэ бырагырааматыгар кылаатын киллэрдэ. Маны сэргэ баһылыктары кытары хочуолунайы тутуу боппуруостарын ырытабыт. Ону таһынан, Өймөкөөн сэлиэнньэтин Биэрэк Үрдэ диэн учаастагын нэһилиэнньэтэ кииннэммит ититиини тутуу уонна холбооһун боппуруоһун туруорар. Манна эмиэ «Теплоэнергосервис» уопсастыба 2023 сылга диэри сэлиэнньэ баһылыгын кытта бэлэмнэнии үлэтин ыытар. 2024 сылга хочуолунай бэлэм буолуохтаах. Онон Саха Өрөспүүбүлүкэтин саамай тымныы сирдэригэр кииннэммит ититии тиийэрэ – биһиги үлэбит сүрүн соруга буолар.