Арассыыйа үс өҥнөөх былааҕа хас биирдиибитигэр көҥүл, тутулуга суох буолуу, ааспыт олохпут историятыгар ытыктабыл, ыччаты Ийэ дойдуга таптал тыыныгар иитии бэлиэтинэн буолар. Судаарыстыбаннай былаах историята Ийэ дойдуларын туһугар турууласпыт үгүс көлүөнэ дьон сыралаах үлэтин уонна албан аатын кытта ыкса ситимнээх. Саха сирэ түөрт үйэ устатыгар Арассыыйа судаарыстыбатын сайдыытыгар дьоһун кылаатын киллэрэр. Ол курдук, биһиги өрөспүүбүлүкэбит дойду хотугулуу-илиҥҥи өттүн туһаҕа таһаарыы уонна сайыннарыы киинэ буолар, экэниэмикэни сайыннарыыга Уһук Илиҥҥэ эрэ буолбакка, бүтүн Арассыыйа үрдүнэн инники кэккэҕэ сылдьар.
Уустук кэмнэр тирээтэхтэринэ, Саха сирин олохтоохторо Аҕа дойду көмүскэлигэр туруналлара. Бүгүн эмиэ кинилэр аан дойдуну нацизмтан босхолуур туһугар, Арассыыйа кэнэҕэскитин атын дойдулар туора өйү-санааны соҥнуур дьайыыларыттан, кыһарыйыыларыттан тутулуга суох көҥүл судаарыстыба буоларын туһугар дойдубут былааҕын аннынан Украинаҕа буола турар анал байыаннай эпэрээссийэҕэ кытталлар. Бу үрдүк миссияны толоро сылдьар хас биирдии киһинэн биһиги киэн туттабыт! Саха сирин бүттүүнүн олохтоохторо үтүөҕэ дьулуурдарын көрдөрөллөр, саҥа былааннары оҥороллор, уустук соруктары быһаараллар. Ол түмүгэр, Саха сирин экэниэмикэтэ бигэтик сайдар, национальнай бырайыактар олоххо киирэллэр, олорор дьиэ-уот уонна суол-иис, иитэр-үөрэтэр, доруобуйа харыстабылын, култуура уонна спорт эбийиэктэрэ тутуллаллар. Намыһах дохуоттаах дьоҥҥо уонна нэһилиэнньэ көмүскэлэ суох араҥатыгар социальнай көмө оҥоһуллар. Төрөөбүт дойдубут өссө күүстээх, сайдыылаах держава буоларын туһугар салгыы бары бииргэ үлэлиэхпит диэн эрэнэбин. Арассыыйа Судаарыстыбаннай былааҕын күнүнэн! Эһиэхэ дьолу-соргуну, чэгиэн-чэбдик туругу, этэҥҥэ буолууну баҕарабын! Үлэҕит-хамнаскыт табылыннын, саҕалаабыккыт сатаннын! Бука барыгытыгар – үтүөнү, или-эйэни!
Саха Өрөспүүбүлүкэтин Ил Дархана Айсен Николаев
-
0
-
0
-
0
-
0
-
0
-
0
