Өймөкөөн чулуу киһитэ, бастакы гильдиялаах меценат-атыыһыт, дьонун-сэргэтин аһынан-үөлүнэн, таҥаһынан-сабынан салҕаабыт, Таҥара дьиэтин туттаран, церховнай-приходской оскуоланы астаран Өймөкөөн сиригэр үөрэх-билии аартыгын арыйбыт, саха ыччата үөрэннин диэн Дьокуускайга таас оскуола дьиэтин туттарбыт, о.д.а. үгүс үтүө дьыаланы оҥорбут Николай Осипович Кривошапкин төрөөбүтэ 185 сыла былырыын бэлиэтэммитэ. Александра Самсоновна бу улуу киһи дьоһун олоҕун түһүмэхтэрин дьүһүйэн көрдөрөр биэс хартыынаны оҥорон, Олоҥхо ыһыаҕын саҕаланыытыгар, бэс ыйын 30 күнүгэр сүрэхтээтэ уонна улууска туттарда.
Александра Самсоновна ону таһынан, Олоҥхо ыһыаҕа олохтоох оскуолаҕа өйдөбүнньүк буолан хааллын диэн, Оҕо түһүлгэтигэр оҕолорго «Доҕордоһуу хаартатын» оҥортордо. Бу үтүө санаа туохтан саҕыллыбытын туһунан кини маннык кэпсээтэ:
– Былырыын Таатта улууһун Дьохсоҕонугар Өксөкүлээх Өлөксөйгө анаммыт өрөспүүбүлүкэтээҕи ыһыах аһыллыбыта. Онно араас нэһилиэктэртэн, улуустартан элбэх оҕо мустубута. Ол иһин, кэнэҕэски өттүгэр өйдөбүнньүк буолан хааллын диэн, биһиги олохоох фотограф Галина Давыдовалыын сүбэлэһэммит, «Доҕордоһуу хаартата» бырайыагы толкуйдаабыппыт. Таатта улууһун нэһилиэктэрин хаартатын уруһуйдаан баран, ону оҕолорго, ким хантан сылдьарынан, араас өҥнөөх кырааскаларынан уруһуйдаппыппыт. Ону улахан дьон эмиэ сүрдээҕин сэҥээрбиттэрэ. Ол иһин быйыл бу манна, Томторго, эмиэ оҥордубут. Бу эрдэттэн бэлэмнэммит оҕолор буолбатах, түһүлгэҕэ ыһыахха кэлбит оҕолору хомуйан уруһуйдаттыбыт.
-
6
-
0
-
0
-
0
-
1
-
0
