Ирина Егоровна көҕүлээһинэн, сүбэтинэн-аматынан: Мэҥэ Хаҥалас Төҥүлүтүгэр, Нам Аппаанытыгар, Кэбээйи үс нэһилиэгэр, Аммаҕа, Үөһээ Бүлүүгэ иис сыахтара тэриллэн, анал байыаннай дьайыыга сылдьар биир дойдулаахтарбытыгар таҥас-сап кэмпилиэктэрин тигэллэр.
Таатта улууһугар маннык сыаҕы Саха Өрөспүүбүлүкэтин үөрэҕириитин туйгуна, “Албан Аат” уордьан толору кавалера Д.А. Петров аатынан Ытык Күөл 2 №-дээх орто оскуолатын технологияҕа учуутала Анна Никифорова иккис сылын салайар.
Сыахха үлэ бэтэрээннэрэ, учууталлар уо.д.а. идэлээх исписэлиистэр иистэнэллэр. Кинилэр «Илии сылааһа» түмсүү уонна Дьохсоҕон нэһилиэгин дьаһалтатын тэрийиилэринэн өрөспүүбүлүкэтээҕи «Иис, үлэ ыһыаҕар» иккис, Саха Өрөспүүбүлүкэтин Бырабыыталыстыбата кыттыылаах иис күрэҕэр үһүс миэстэни ылан тураллар.
Ааспыт уһун өрөбүл күннэрин туһананнар, үлэ бэтэрээннэрэ Галина Дедюкина, Анастасия Оросина, учууталлар Александра Бочурова, Анна Никифорова, педагог Валентина Собакина, СВО кыттыылааҕын ийэтэ, педагог-библиотекарь Марианна Мочкина, страховка агена Аграфена Баишева, «Доҕордоһуу» норуодунай үҥкүү ансаамбылын костюмера Саргылаана Слепцова анал байыаннай дьайыыга сылдьар биир дойдулаахтарбытыгар уочараттаах кэмпилиэктэри тиктилэр. Маннык улахан ситимнээх үлэтэ тэриллэн, ийэ, эбэ алгыһынан тигиллибит сылаас таҥастар уолаттарбытын араҥаччылыы, дурда-хахха, харысхал буолан, этэҥҥэ эргиллэллэрин кэрэһэлээтиннэр.
Вера КАНАЕВА, Таатта, Ытык Күөл.
Эргиллиэ
Төрөөбүт дойдум сылааһа
Таптала, эрэлэ, эйэтэ,
Биир күрүс үлэнэн көмөтө
Барыта ананар эһиэхэ.
Санаалыын, сүрэхтиин холбоһон,
Сайаҕас тарбахтан тиһиллэн,
Илгийэр дойдубут аһыттан
Тиийиэхтин бу көмө оҕобор.
Эргийиэ кэтэһии күөнүттэн,
Эр санаа хотойо кыырайан,
Эн, кини, барыбыт күүһүнэн
Эйэ, ийэ хорсуна буойуттар!
Сыгыйык
-
10
-
0
-
0
-
0
-
0
-
0
