Ааспыт күһүн үүнүүтүн хомуйан баран, кыһыҥҥы улахан тымныы кэмигэр тэпилииссэтин сынньаппыт. Ол эрээри, тоҥон хаалбыт буору саҥаттан ириэрэр сүрдээх ыараханын иһин, гаас оһоҕун араарбатах, 5 кыраадыс сылааска туруорбут.
– Тэпилииссэҕэ Варвара Новгородовалыын иккиэ буолан үлэлиибит. Оҕурсубут сиэмэтин олунньу 19 күнүттэн саҕалаан тылыннарбыппыт уонна арассаадаларбыт үчүгэйдик тахсыбыттарын кэнниттэн, кулун тутар 12 күнүттэн буорга 300 угу олордубуппут. Бэркэ ылсан үүннүлэр, ас кутан эрэллэр. Бастакы оҕурсулары муус устар 20 күнүн эргин быһарга суоттанабыт. Оттон помидору сайын олордуохпут, – диир Евдокия Степановна.
Бу 300 ук оҕурсуну таһынан, нэһилиэнньэҕэ атыыга анаан, сүүһүнэн арассааданы үүннэрбиттэр. Биир иһиккэ уопсай тылыннарыллыбыт үнүгэстэри тус-туһунан иһиттэргэ көһөрөргө Дьарыктаах буолуу киинин үлэһиттэрэ кэлэн субуотунньуктаабыттар, ону таһынан бөһүөлэк дьахталлара, бэл, атын улуустар олохтоохторо: «Сибэкки Дуунньаттан оҕуруот аһын олордорго, көрөргө-истэргэ үөрэниэ этибит», – диэн анаан-минээн кэлэн көмөлөһөр эбиттэр.
Чахчыта даҕаны, өрөспүүбүлүкэҕэ киэҥник биллэр уопуттаах оҕуруотчуттан киһи үөрэнэрэ элбэх бөҕө буоллаҕа. Холобур, Мэҥэ Хаҥаластан, Чурапчыттан Далбар хотуттар кэлэн, көмөлөһө таарыйа оҕуруот буорун хайдах оҥорор, оҕуруот аһын арааһын хайдах көрөр-истэр, туох эбиилиги туһанар туһунан сүбэлэтэн-амалатан барбыттар. Муома кыыһа Сталина кэргэнэ Капитоннуун куораттан тахсан, тэпилииссэни кыйа оҥоһуллубут долбуурдар хаптаһыннарын саҥардан биэрбиттэр.
Эркинин аллараа өттө сэндвич-панель, үөһээ өттө уоннна үрдэ поликарбонат тэпилииссэни сааскы күн уота эргиччи тыгар, угуттуур. Онон таһырдьа кыс хаар төһө да үллэн сыттар, оҕуруоччуттар кыһамньылаах илиилэринэн биэбэйдэнэр арассаадалар хамсыы-хамсыы үүнэллэр.
Хаартыскалары Евдокия Гаврильева хааччыйда
-
6
-
2
-
0
-
0
-
0
-
1
