1951 с. К.А.Тимирязев аатынан Москватааҕы тыа хаһаайыстыбатын академиятын бүтэрэн кэлэн, Мэҥэ Хаҥалас улууһугар МТС-ка, тыа хаһаайыстыбатын иниспиэксийэтигэр кылаабынай агрономунан, 1961 сылтан Тыа хаһаайыстыбатын научнай-чинчийэр институт иһинэн үлэлиир Покровскайдааҕы уопутунай хаһаайыстыба ыстаарсай агроном-овощеводунан үлэлээбитэ. Мэҥэ Хаҥалас оройуонун Хаптаҕай чулуу оҕуруоччуттарын, ол иһигэр Социалистическай Үлэ Дьоруойа Гавриил Самсоновы кытары бииргэ үлэлээн, араас оҕуруот аһын уонна хортуоппуйу үүннэрии бастыҥ уопутун олохтообута. 1965 с. хас гектар ахсыттан 322 сэнтиниэр үүнүүнү, ол иһигэр, 503 сэнтиниэр хаппыыстаны ылбыттара. Ол түмүгэр ити хаһаайыстыба холкуостар, сопхуостар салайар үлэһиттэрин, алын сүһүөх агрономнарын, оҕуруотчуттарын үөрэтиигэ тирэх бааза буолбута.
Уһун, тымныы кыһыннаах, кылгас, кураан сайыннаах хотугу дойдуга оҕуруоту үүннэриигэ үрдүк көрдөрүүлэри ылары ситиспит, үгүс оҕуруоччуту уһуйан таһаарбыт сырата сиэрдээхтик сыаналанан, ССРС Үрдүкү Сэбиэтин Президиума 1966 с. муус устар 30 күнүгэр таһаарбыт ыйааҕынан Матрена Матвеевна Корнилова Социалистическай Үлэ Дьоруойун үрдүк аатынан бэлиэтэммитэ.
Дьоруой агроном 1967-1972 сс. Тыа хаһаайыстыбатын министиэристибэтин сири оҥорууга салаатын салайааччынан, 1972-1976 сс. «Сортсемовощ» соҕотуопкалыыр пуун сэбиэдиссэйинэн, 1976-79 сс. ТХНЧИ ыстаарсай агрономунан үлэлээбитэ. 1967-1971 сс. Саха АССР Үрдүкү Сэбиэтин дьокутаатынан талыллан, быыбардааччыларын накаастарын толорууга үтүө суобастаахтык үлэлээбитэ.
Социалистическай Үлэ Дьоруойа, РСФСР уонна Саха АССР үтүөлээх агронома Матрена Корнилова 1991 с. балаҕан ыйын 4 күнүгэр, 76 сааһыгар олохтон туораабыта.
Хаартыска Тыа хаһаайыстыбатын уонна ас-үөл бэлиитикэтин министиэристибэтин архыыбыттан
-
1
-
0
-
0
-
0
-
0
-
0
