Төрөппүт сыла оҕо уһуйаанын иитэр-үөрэтэр үлэтигэр төрөппүттэри кыттыһыннарар, ыкса үлэлэһэр, сонун сүүрээннэри киллэрэр, норуот педагогикатын туһанар сыаллаах-соруктаах ананна. Онуоха, былааннаммыты олоххо киллэрэргэ, үһүс сылын Вероника Анатольевна Федотова салайар Төрөппүт сүбэтэ төһүү күүс буолар.
Алтынньы 28 күнүгэр Ф.И. Авдеева аатынан Оҕо айымньытын дьиэтигэр Төрөппүт сылын үөрүүлээх быһыыга-майгыга аспыппыт. Маныаха, Төрөппүт сүбэтэ күүскэ үлэлэһэн, уһуйаан оҕолорун, кэлэктииби, төрөппүттэри бииргэ түмэн улахан кэнсиэр туруорбуппут.
Уһуйааммытыгар 12 бөлөх баар. Төрөппүтү кытта үлэҕэ бырайыактар хайысхаларын төрөппүттэр иитээччилэрин кытта сүбэлэһэн бииргэ талбыттара уонна үлэлэрин алтынньы ыйтан саҕалаабыттара. Ол курдук уһуйааммытыгар оҕо тылын, саҥатын сайыннарар “Чугдаарар чуорааннар”, “Төрөөбүт тыл түһүлгэтэ”, дьиэ кэргэҥҥэ болҕомтону туһаайар “Дьиэ кэргэн”, “Ийэм, аҕам идэлэрэ”, “Төрүччүбүн билиим”, “Дьиэ кэргэним – мин баайым”, “Мин төрүччүм – дьиэ кэргэним”, “Дьиэ кэргэн уонна уһуйаан – биир ситим”, доруобуйаны, куту-сүрү бөҕөргөтөргө “Оҕо саастан чэгиэн-чэбдик буолуоҕуҥ!”, “Өбүгэбит оонньуутун үөрэ-көтө оонньуоҕуҥ!”, патриотическай иитиигэ анаммыт “Мин саха ыччатабын”, “Дьокуускай куорат бэлиэ сирдэрэ” бырайыактар үлэлииллэр.
Сыл аҥаардааҕы түмүгүнэн 139 төрөппүт уһуйааҥҥа кэлэн, оҕолорго дьарыктары, аралдьытыылары ыыттылар. Балаҕан ыйыгар “Иитээччи күнүн” көрсө аһаҕас аан күннэригэр 56 төрөппүт иитээччилэри кытта тэҥҥэ сылдьан үлэлээн көрдүлэр. Ону таһынан, бөлөхтөргө сайыннарар эйгэни байытыыга 293 төрөппүт көмөлөстө. Оҕолорун тыйаатырга 70, түмэлгэ 82, бибилэтиэкэҕэ 68 төрөппүт сырытыннарда.
Бу күннэргэ бырайыак үлэтин кэтээн көрүү түмүгүнэн үлэ сөптөөх тэтиминэн ыытыллан иһэрэ бэлиэтэннэ. Бөлөхтөрүнэн бырайыак үлэтигэр төрөппүттэр да, иитээччилэр да көхтөөхтүк ылсан, оҕолор сайдыыларын туһугар саҥаттан саҥаны толкуйдаан, күннэтэ айымньылаахтык үлэлииллэр. Төрөппүт сыла салҕанар.
Жанна БАРАШКОВА,
Е.Г. Корнилова аатынан “Кэскил” уһуйаан социальнай педагога
-
2
-
1
-
0
-
0
-
0
-
0
