Онтон улуус дьаһалтатыгар эппиэттээх үлэһиттэри, уопсастыбаннай тэрилтэлэр салайааччыларын кытта кэпсэтии, былааннаныы буолла. Салгыы икки аҥыы хайдыһан, үөрэх салалтатыгар уонна киин бибилэтиэкэҕэ сырыттылар. Үөрэх салаатын үлэһиттэрин кытта көрсүһүүгэ улууска үөрэхтээһин ситимигэр ханнык хайысхалаах үлэлэр, бырайыактар киириэхтэрин сөбүгэр санааларын атастастылар. Үөрэх управлениетыгар кэпсэтиини начаалынньык Федор Татаринов, улуустааҕы киин бибилэтиэкэҕэ дириэктэр Лена Павлова салайан ыыттылар. Бибилэтиэкэҕэ көрсүһүүгэ улахан дьону тэҥэ Мүрү 1-дээх орто оскуолатын уонна «Уолан» гимназия үөрэнээччилэрэ эмиэ кытыннылар. Ыалдьыттар кинилэргэ кэлбит сыалларын-соруктарын билиһиннэрдилэр, аныгы технологиялар баһылаабыт, куйаар ситимэ, оҥоһуу өй күннээҕи олоххо күүскэ өтөн киирэр кэмнэригэр оҕону иитиигэ саха тылын, сахалыы ааҕыы, төрүт дьарыктар суолталарын туһунан кэпсээтилэр. Норуоппут инники дьылҕатыгар долгуйар дьон бары түмсэн, сахалыы өй-санаа, төрөөбүт тыл тыыннаах буолалларын туһугар бииргэ үлэлииргэ ыҥырдылар, онуоха бэйэлэрэ көмө, тирэх буолар бигэ санаалаахтарын биллэрдилэр.
Күн иккис аҥаарыгар ыалдьыттар I-II Хоро нэһилиэктэригэр олохтоохтору кытта көрүстүлэр. Манна нэһилиэктэр баһылыктара Алексей Ушницкай, Василий Бурцев, оскуолалар учууталлара, уопсастыбаннас бэрэстэбиитэллэрэ, оскуола оҕолоро кыттыыны ыллылар. Сэһэргэһии кэмигэр олохтоохтор «Ийэ тыл» сүбэтин тэрийэллэрин, Майаҕаска салайааччынан бибилэтиэкэр Ксения Кириллина, Чараҥҥа И.И.Находкин аатынан култуура киинин уус-уран салайааччыта Екатерина Свинобоева үлэлэһиэхтээхтэрин эттилэр. Салгыы атах тэпсэн олорон кэпсэтии Мүрү нэһилиэгин дьаһалтатыгар буолла. Баһылык уонна дьаһалта актыыба бааллар. Манна эмиэ төрөөбүт тылларын туһугар ис сүрэхтэриттэн ыалдьар дьон мустубуттар. Онон кэпсэтии дириҥ ис хоһоонноох буолла. Бириэмэҕэ ыктаран, санааларын эппэккэ хаалбыттар салгыы түмүк мунньахха улуус дьаһалтатын саалатыгар ситэрэн-хоторон эттилэр.
Уусалданнар саха тылын туһугар туруулаһыыга сүрдээх көхтөөхтөрө, бары түмсэн үлэлииргэ бэлэмнэрэ үөрдэр. Көрсүһүүлэргэ кыттыбыт улуус олохтоохторо кэлбит ыалдьыттарга дойдуларыгар көмө буолар кэскиллээх санааларын, сыаналаах сүбэлэрин иһин махталларын биллэрдилэр. Биир дойдулаахтарын кытта бу күн Улуус мунньаҕын бэрэссэдээтэлэ Иннокентий Аммосов уонна улуус баһылыгын солбуйааччы Алексей Тарасов бииргэ сылдьан үлэлэстилэр. Түмүккэ улуус хас биирдии нэһилиэгэр «Ийэ тылга» үлэлэһэр түмсүүлэри тэрийэргэ, бу хайысхаҕа үлэни салгыы сайыннаран, саҥа бырайыактары тэрийэн ыытарга сүбэлэстилэр. Ити курдук, куораттан кэлбит биир дойдулаахтара нэһилиэнньэни, үөрэнээччилэри кытта көрсөн, санаа атастаһан, сүбэ-ама биэрэн, инникитин икки өттүттэн бииргэ үлэлииргэ сибээһи олохтоон төнүннүлэр.
Галина БОЧКАРЕВА.
Хаартыскалар: ааптар уонна улуус дьаһалтатын пресс-сулууспатын түһэриилэрэ.
-
5
-
0
-
0
-
0
-
0
-
0
