Ойуур баһаардарын утары үлэ хаһан баҕарар күүскэ барар. Быйыл «Авиалесоохрана» парашютунан ыстанар десантнай бөлөҕүн исписэлииһин ахсаана улаатта. Ил Дархан Айсен Николаев Бэрэсидьиэн Владимир Путины кытары кэпсэтиитин түмүгүнэн, ойуур баһаардарын кытары охсуһууга көрүллэр үп кээмэйэ улаатта. Быйыл федеральнай бүддьүөттэн бу сыалга 4,3 млрд. солкуобай көрүллүөҕэ, оттон эрэгийиэн бүддьүөтүттэн – 1,3 млрд. солкуобай. Бу ааспыт сыллааҕы көрдөрүүнү икки төгүл куоһарар.
Авиасалаалары күүһүрдэргэ 121 исписэлиис ананна, Саҥыйахтаах уонна Витим бөһүөлэктэригэр саҥа тэриллэр подразделениеларга 60 испиэлиис ыстаата көрүлүннэ.
Сотрудниктары үөрэтии куурустарынан ыытыллар. Быйыл 703 парашютнай-десантнай баһаарынай сулууспа 703 байыаһа, исписэлииһэ анал үөрэтэр куурустары аастылар.
Манна даҕатан эттэххэ, ойуур баһаардарын кытары охсуһууга үбүлээһин 2021 сылтан Владимир Путин дьаһалынан саҕаламмыта. Инньэ гынан, «Авиалесоохрана», «Якутлесресурс» тэрилтэлэр үлэһиттэрин ахсаана эбилиннэ, анал тиэхиньикэ атыылаһылынна, саҥа авиасалаалар арылыннылар, сөмөлүөтүнэн көтө сылдьан салгынтан кэтэбил чааһа эбилиннэ.
--Ойуур баһаардарын утары охсуһууга саҥа технологиялары уонна ньымалары киллэрэбит. Быйыл Өлүөхүмэ улууһун Даппарай уонна Троицкай сэлиэнньэлэрин икки ардыларыгар эспэримиэн быһыытынан чаҕылҕаны аһардар анал тэрил туруорулунна. Бу учаастак мээнэҕэ талыллыбата -- манна чаҕылҕан түһүүтэ олус элбэх, ол ойуур баһаардарын сүрүн төрүөтэ буолар. Пилотнай бырайыак түмүктэрин аны икки-үс сылынан билиэхпит, чахчы көдьүүстээҕин көрдөрдөҕүнэ, уопуту атын улуустарга тарҕатыахпыт, -- диэн иһитиннэрдилэр.
Хаартыска: Экология, айылҕаны туһаныы уонна ойуур хаһаайыстыбатын пресс-сулууспата
-
0
-
0
-
0
-
0
-
0
-
0
