Кини этэринэн, быраабы араҥаччылыыр уорганнар ууга куттал суох буолуутун хааччыйарга туһуламмыт эриэйдэлэри ыыттылар. Ону тэҥэ, буруйу оҥорооччулары холуобунай уонна административнай эппиэккэ тардыыга хонтуруол күүһүрдэ.
"Быйылгы сылга ууга хас да быһылаан бэлиэтэннэ. Ол курдук, «Дьокуускай-Аллараа Бэстээх» сабыылаах өрүһү туорааһыҥҥа таһаҕаһы тиэйэр массыыналар муус анныгар тимирбиттэрэ, итиэннэ оҥочо түҥнэстибитин түмүгэр өрүскэ киһи сүппүт быһылаана бэлиэтэммитэ. Бары быһылааннарга бэрэбиэркэ ыытыллар", – диэн кэпсээтэ Артем Ильин.
Кини кыраасданнар болҕомтолорун сокуонунан көрүллэр эппиэккэ тардыллар миэрэлэргэ туһаайда. Чуолаан, РФ холуобунай кодексын 263-с ыстатыйатынан, куттал суох буолуутун быраабылатын кэһии уонна иһинээҕи уу тырааныспарын туһаныы иһин 15 сылга диэри болдьохтоох буруйга тардыллыахха сөп.
«Ааспыт сайыҥҥы навигацияҕа 17 киһи өлбүтэ, ол иһигэр 1 оҕо. Сураҕа суох 6 киһи сүппүтэ, 3 киһи доруобуйатыгар улахан охсууну уонна атын эчийиини ылбыта. 12 киһиэхэ суукка бэриллибит холуобунай дьыала көбүтүллүбүтэ. Буруйдаахтар бары эппиэккэ тардыллыбыттара, тырааныспардара былдьаммыта», - диэн эрэгийиэн тырааныспарга борокуруора бэлиэтээтэ.
Маны таһынан, Административнай сокуону кэһии туһунан РФ Кодексын 11.8 ыстатыйатын 1 чааһынан, тиэхиньиичэскэй көрүүтэ суох кыра суудуналары ыытыы иһин административнай эппиэтинэс көрүллэр. Маны сэргэ, бу ыстатыйанан, ыытар бырааба суох эрээри уу тырааныспарын ыыттахха эбэтэр маннык киһиэхэ тырааныспары ыыттардахха эппиэтинэскэ тардыллаҕын.
Административнай сокуону кэһии туһунан РФ Кодексын 14.43 ыстатыйатынан уу тырааныспарын туһаныыга тиэхиньиичэскэй эрэгилээмэн ирдэбиллэрин кэһии иһин 300 тыһыынча солкуобайга диэри ыстараап көрүллэр.
Кэтиир уорганнар кыраасданнар ууга быһыы-майгы быраабылатын уонна уу тырааныспарын туһаныыга куттал суох буолуутун ирдэбилэрин кытаанахтык тутуһалларыгар ыҥыраллар.
Сиһилии: https://www.sakha.gov.ru/news/4513
Иһитиннэрии уонна хаартыска: СӨ Ил Дарханын уонна Бырабыыталыстыбатын пресс-сулууспата
-
0
-
0
-
0
-
0
-
0
-
0
