Ый устата баһаарынай сулууспа үлэһиттэрэ улууска олорор дьиэлэри, чааһынай гараажтары, баанньыктары бэрэбиэркэлиэхтэрэ. Төһө кыалларынан олорор дьиэлэри 100% хабан буруоттан тыаһаан сэрэтэр тэриллэри (АДПИ) туруорарга сорук турар.
Онуоха “Чурапчы нэһилиэгэ” тыа сирин түөлбэтин дьаһалтата (баһылык Владимир Сивцев) соҕотох олорор кырдьаҕастарга итиэннэ элбэх оҕолоох ыалларга босхо буруо биллэрээччилэри ааспыт ыйтан саҕалаан түҥэтэсылдьаллар.
Куттал суох буолуутун хааччыйар сыалтан Чурапчы бөһүөлэгин дьаһалтата, баһаарынай чаас үлэһиттэрин кытары ыкса үлэлэһэннэр улахан суолталаах дьаһалы ыыталлар. Ол курдук, барыта холбоон 79 ыалга босхо автономнай буруо биллэрээччилэри (АДПИ) түҥэтэллэр, туруоран биэрэллэр.
Баһаартан сэрэтэр үлэҕэ нэһилиэк дьаһалтатын исписэлииһэ, анал байыаннай дьайыы кыттыылааҕа Иннокентий Ноговицын, баһаарынай сулууспа сотрудниктара Марианна Захарова уонна Андрей Ортюков бииргэ үлэлииллэр.
Кинилэр ыалларынан сылдьан, тэриллэри дьиэ ордук кутталлаах сирдэригэр туруораллар, ону таһынан хайдах туһанары уонна батареятын ханан уларытары сиһилии быһаараллар.
“Биһиги бөһүөлэкпит дьаһалтата элбэх оҕолоох ыалларга куттал суоһаабатын туһугар улахан болҕомтотун уурар. Буруо биллэрээччи – бу омос көрдөххө кыра тэрил буолан баран, уоттан-күөстэн сэрэтиигэ олус улахан көмөлөөх. Ордук түүн, дьон утуйа сытар кэмнэригэр, буруо тахсар түгэнигэр тута сытыы тыаһын иһитиннэрэр уонна киһи олоҕун быыһыырга кыаҕы үөскэтэр”, — “Чурапчы нэһилиэгин” тыа сирин түөлбэтин дьаһалтатын исписэлииһэ Иннокентий Ноговицын бэлиэтээтэ.
Чурапчы нэһилиэгин олохтоохторо маннык дьоһуннаах көмө иһин махталларын биллэрэллэр. Кырдьык даҕаны, баһаартан сэрэнии – хас биирдии дьиэ кэргэн дьоллоох олоҕун мэктиэтэ буолар. Дьаһалта өттүттэн маннык хабааннаах үлэ ыытыллара кэрэхсэбиллээх.
Сонун төрдө уонна хаартыска: "Саҥа олох", Сэмэн ЖЕНДРИНСКЭЙ
-
0
-
0
-
0
-
0
-
0
-
0
