2016 сылга Саха иирин Ил Дархана «Саха Өрөспүүбүлүкэтигэр сылгыны үөрдээн иитиини сайыннарыы дьаһалларын» туһунан ыйааҕар саха төрүт дьарыгын сайыннарар, сылгыһыты өрө тутар сыалтан кулун тутар 21 күнүн Сылгыһыт күнүнэн биллэриллибитэ. Онон быйыл биһиги өрөспүүбүлүкэбитигэр бу бэлиэ күнү бэһис төгүлүн бэлиэтиибит.
Саха норуотугар сылгыны иитии үгэс буолбут үлэ көрүҥэ эрэ буолбатах, бу – үйэлэри уҥуордаан бүгүҥҥү күҥҥэ тиийэн кэлбит биһиги култуурабыт, олохпут-дьаһахпыт сүнньэ. Өрөспүүбүлүкэҕэ бу салааны сайыннарар дьоһун үлэ тыа сирин биир тутаах үлэһиттэригэр – сылгыһыттарга сүктэриллэр.
Билиҥҥи туругунан, сыллата федеральнай уонна өрөспүүбүлүкэ үбүн холбоон 240 мөл. солк. эрэ көрүллэр. Тэҥнэбил курдук эттэххэ, 181 тыһ. хороҕор муостаахха 4 млрд. солк. көрүллэр. Сыспай сиэллээхпит ынах сүөһү ахсааныгар тэҥнэстэ, ол эбэтэр эмиэ 181 тыһыынчаттан таҕыста. Былаан быһыытынан, сылгы ахсаана 2022 сылга 200 тыһыынчаны аһары түһүөхтээх.
Кыһыҥҥы бытарҕан тымныыга, сайыҥҥы өҥүрүк куйааска аһаҕас халлаан анныгар сылдьан, сыспай сиэллээҕи тэнитэр туһугар өрөбүлэ суох күннэтэ сыралаһар, ыарахан үлэҕэ ис сүрэхтэн бэриниилээх дьоҥҥо – сылгыһыттарга судаарыстыба өттүттэн көмө улаатыан наада.
Сылгыһыт күнүнэн тыа сирин хоһуун дьонугар үтүө түмүктэрдээх, ситиһиилээх үлэни, чэгиэн туругу, чөл олоҕу, дьолу-соргуну баҕарабын.
Түөрт түөрэм туйахтаах сыспай сиэллээх Дьөһөгөй оҕото сыһыы-сыһыы аайы кистээн дьырылаттын, саха норуотун ааттата, байыта турдун!
Ытыктабылы кытта Ил Түмэн дьокутаата Руслан Еремеевич Федотов
Кулун тутар 21 күнэ, 2021 с.
-
0
-
0
-
0
-
0
-
0
-
0
