Айсен Сергеевич Анал этиитигэр бастатан туран Анал байыаннай дьайыыга сылдьар байыастарга өрөспүүбүлүкэ Бырабыыталыстыбата улахан болҕомтотун уурарын чиҥэтэн эттэ. Биһиги парламеммыт иһигэр анал сис кэмитиэт тэриллибитин, буойуттар уонна кинилэр дьиэ кэргэттэрэ көмүскэллээх, инникигэ эрэллээх буолалларын туһугар туох дьаһаллар ылыллалларын туһунан эттэ.
Аартыка боппуруоһунан дьарыктанарым быһыытынан, Ил Дархан Аартыканы сайыннарыыга ыытыллар үлэ-хамнас, инники соруктар тустарынан эппитин олус чугастык ылынным. «Хотугу собуос туһунан» федеральнай сокуон ылылларыгар өрөспүүбүлүкэ Бырабыыталыстыбата, Ил Түмэн улахан үлэни ыыппыттарын түмүгэр аны икки сылынан улахан хамсааһыннар буолуохтара, Аартыка 13 улууһуттан сэттэтигэр (Усуйаанаҕа, Абыйга, Сааскылаахха, Черскэйгэ, Зырянкаҕа, Орто Халымаҕа, Тиксиигэ) Эргиэн-логистика кииннэрэ арыллан, ас-таҥас удамыр сыанаҕа батарылларын тэрийии олохтоох нэһилиэнньэ сэҥээриитин ылла, маннык киин сотору кэминэн Эдьигээҥҥэ аһыллар, 2025 сылга диэри Аартыка 13 улууһугар барытыгар тэриллиэҕэ.
Айсен Николаев Хотугу Муустаах муора суолун сайдыытын бастакы хардыыта бу сыллартан саҕаланарын, онно Тикси-Найба агломерацията Арассыыйа Федерациятын Аартыкатааҕы түбэтин тирэх пуунун быһыытынан федеральнай былааҥҥа киллэриллэн, үбэ-харчыта быһаарыллан, Булуҥ улууһа сайдыы саҥа таһымыгар тахсыаҕын, олох-дьаһах хаачыстыбата тупсуоҕун эттэ.
Ил Дархан үүнэр 2024 сылы Оҕо сылынан биллэрдэ. Сайдыы төрдө барыта оҕо туруктаах, бэйэтигэр эрэллээх, сайдыылаах ыччат буола үүнэн, төрөөбүт дойдутун чэчирии сайыннарарын туһугар үлэлиригэр-хамсыырыгар туһуланар. Оҕолорбутун биһиги оннук иитэн-такайон таһаарыахтаахпыт. Оҕолор биридимиэттэринэн олимпиадаларга уонна спортивнай тэрээһиннэргэ кыттан, улахан ситиһиилэннэхтэринэ, сыл аайы бэриллэр Ил Дархан бириэмийэтэ олохтонно. Арассыыйаҕа Дьиэ кэргэн сыла биллэриллибитэ улахан ис хоһоонноох. Дьиэ кэргэҥҥэ оҕо баар буоллаҕына, дьиэ кэргэн иллээх-эйэлээх, бигэ туруктаах, олоххо тардыһыылаах буолар. Оҕо төрөөһүнүн көрдөрүүтүнэн Саха сирэ Уһук Илиҥҥэ инники кэккэҕэ сылдьар, ити дьон-сэргэ олоххо эрэллээҕин көрдөрөр. Онон, бу хайысхаҕа өссө элбэх былааннар ылыллыахтара диэн бигэргэттэ.
Айсен Сергеевич Анал этиитэ өрөспүүбүлүкэ хас биирдии олохтооҕор ананар. Кини үлэтэ-хамнаһа, үөрэҕэ, дьиэтэ-уота барыта бигэ туруктаах буоларын туһугар. Биһиги Анал этиини өйүүбүт уонна инники күөҥҥэ тахсарга элбэх үлэ эрэйиллэрин бэлиэтиибит.
Хаартыскаҕа Василий Кононов (Ил Түмэн) түһэриилэрэ
-
1
-
0
-
0
-
0
-
0
-
0
