Саха сирин историятыгар суолталаах түгэннэр аҕыйаҕа суохтар, олор ортолоругар муус устар 27 күнэ ураты миэстэни ылар – быданнаабыт 1922 сылга Саха Автономнай Сэбиэскэй Социалистическай өрөспүүбүлүкэтэ тэриллибитэ.  Онтон 70 сыл ааһыыта, 1992 сыл муус устар 27 күнүгэр дойдуга биир бастакынан Төрүт Сокуон -- Саха Өрөспүүбүлүкэтин Конституцията күүһүгэр киирбитэ, ити Саха сирэ саҥа Россия Федерациятын састаабыгар үүнүү-сайдыы суолунан иннин диэки дьулурҕатык барарын хааччыйбыта. Бу күн биһиги улуу өбүгэлэрбитин, Саха АССР төрүттээбит ытык дьоммутун: Платон Ойуунускайы, Максим Аммосовы, Исидор Бараховы, Степан Аржакову, атын бэлиэ суоллаах-иистээх уопсастыбаннай уонна политическай деятеллэри кэриэстээн, кинилэр ааттарыгар сүгүрүйэбит.

«Саха Өрөспүүбүлүкэтин Күнүн» бырааһынньыга Саха сирин элбэх национальностаах норуотун сомоҕолоһуутун, ил-эйэ бэлиэтинэн буолар. Айымньылаах үлэнэн уонна түмсүүлээх буолан, өрөспүүбүлүкэбит дойду бүттүүнүн социальнай-экономическай сайдыытыгар биллэр улахан кылаатын киллэрэр.

Бу судургута суох кэмҥэ норуоттарбыт бастыҥ үгэстэригэр тирэҕирэн, кутталлаах ыарыыны кыайар туһугар биһиги түмсүөх тустаахпыт, или-эйэни харыстаан, аныгы ньымалары уонна көдьүүстээх суоллары туһанан, үөскээбит уустуктары туораан, бэйэ-бэйэни өйөһүүнэн, тус бэйэ дьиссипилиинэтинэн, төһө кыалларынан кыра сүтүктээх уонна ороскуоттаах бу күүтүллүбэтэх балаһыанньаттан тахсыахтаахпыт.

Саха Өрөспүүбүлүкэтигэр Дойдуга бэриниилээх буолуу сылыгар бастыҥ санааларбытын-толкуйдарбытын уонна күүспүтүн түмэн, төрөөбүт өрөспүүбүлүкэбит уонна тапталлаах Россиябыт сайдалларын туһугар олоҕу-дьаһаҕы чөлүгэр түһэрэр кыахтаныахпыт диэн эрэнэбин!

Олоҥхо дойдутугар мэлдьи ил-эйэ туругурдун!

Төрөөбүт Сахабыт сирэ сайдарын туһугар ​кытаанах доруобуйаны,​​ эрэл санааны уонна чопчу​ ситиһиилэри баҕарабын! Уруй-Айхал!

Ытыктабылы кытта, Саха Өрөспүүбүлүкэтин Конституционнай суутун Бэрэссэдээтэлэ, Россия юристарын Ассоциациятын Саха сиринээҕи регионнааҕы салаатын бэрэссэдээтэлэ, юридическай наука доктора, профессор  А.Н. КИМ-КИМЭН