Ил Дархан Сунтаар атын нэһилиэктэригэр куттал суоһаабатын туһуттан вахтовай бөһүөлэктэн киириини-тахсыыны тохтотоллорун туһунан эттэ. Атын икки киһи ыалдьыбыта Дьокуускайга бэлиэтэммит. Ыалдьан эмтэнэ киирбит киһи дьиэ кэргэттэриттэн дьаҥҥа ылларбыттар.  Маны таһынан Айсен Николаев  Алдан улууһугар эбии ыалдьыбыт киһи суоҕун уонна Дьокуускай куорат перинатальнай киинин үлэһиттэрин уонна сытар дьонун анаалыстара вирус суоҕун көрдөрбүтүн туһунан иһитиннэрдэ.  Чайыҥдатааҕы гаас хостуур сиргэ эмп үлэһиттэрин бөлөҕө үлэлии сылдьар. 10 тыһ. киһиттэн анаалыс ыланнар, Москва уонна Санкт-Петербург лабораторияларыгар ыытыахтара.  Билиҥҥи туругунан,  Саха сиригэр уопсайа 126 киһи ыалдьыбыта биллэр.

   Бу сарсыарда Сунтаар баһылыга Анатолий Григорьев дьонугар-сэргэтигэр телевизорынан иһитиннэриитигэр, «Вахтовай бөһүөлэккэ аан бастаан ыалдьыбыт икки киһи алтыспыт дьонуттан анаалыс ылан, Дьокуускайга ыыпыппытыттан 8 киһи ыалдьыбыта билиннэ. Бу сарсыарда суһал үлэ ыстаабын кытары мунньахтаатыбыт уонна Сунтаар улууһун инфекционнай балыыһатыгар бу дьон эмтэнэллэрин туһунан быһаарыы ыллыбыт. Билигин Өрөспүүбүлүкэ балыыһата биһиэхэ эмп-том уонна оборудование ыытан эрэр, ону кытта 5 тыһ. мааска кэлиэҕэ. Ол кэннэ эбии 12 тыһ. мааска ыыталлара былааннанар. Вахтовай бөһүөлэктэн ким да тахсыбатын-киирбэтин курдук түүннэри-күнүстэри дьуһуурустуба олохтоотубут”, - диэн кэпсээтэ.