Ким дьиэтиттэн тахсар кыаҕа суох социальнай ситимнэр нөҥүө (инстаграмҥа, фейсбукка, уо.д.а. ситимнэргэ) сэрии кыттыылаахтарын мэтириэттэрин уган үллэстэллэрэ үгэскэ кубулуйда, норуоту сомоҕолуур, көлүөнэлэри сибээстиир буола улаатта. Бары билэргит курдук,  Арассыыйа үрдүнэн быйылгы үбүлүөйдээх Улуу Кыайыы 75 сылыгар анаммыт  тэрээһиннэр СOVID-19  ыарыы пандемията биллэриллибитинэн  уулуссаҕа ыытыллыбаттар.  Барыта интэриниэккэ. Ыам ыйынааҕы бырааһынньыктар, ону тэҥэ Күөх Маай тэрээһиннэрэ былааннаммытын курдук, төһө кыалларынан, барыта интэриниэт нөҥүө - онлайн ыыттыллыаҕа. Ол эрээри, дьиэҕэ олоруу эрэсиимин кэмигэр  дойдубут эригийиэннэринэн "Өлбөт үйэлээх полк" норуот хамсааһынын араас көрүҥүнэн ыытар туһунан быһаарыы ылыннылар. Бүгүҥҥү эйэлээх олох туһугар олохторун толук ууран туран, сэриилэспит дьоммутун хайаан даҕаны кэриэстиэх тустаахпыт.

Санатар буоллахха, “Өлбөт үйэлээх полк” диэн ааты 2012 сыллаахха Томскай куорат олохтоохторо иҥэрэн тэрийбиттэрэ. Дьокуускайга 2013 сыллаахха бу саҕалааһыны “Якутск вечерний” хаһыат өйөөн ыыппыта. Тэрээһиҥҥэ барыта 2 тыһ. кэриҥэ киһи кыттыбыта биллэр. Салгыы 2016 сыллаахха норуот хамсааһына киэҥ далааһыннаммыта. Москваҕа 700 тыһ., Дьокуускайга 18 тыһ. киһи сэрии дьоруойдарын хаартыскаларын тутан хаампыта. Аллайыахаҕа буурҕа да түстэр кыттааччылары тохтоппотоҕо.

Быйылгы аан маҥнайгытын онлайн ыытыллар "Өлбөт үйэлээх полк" норуот хамсааһына эригийиэннэринэн ылан көрөр буоллахха маннык:

 - Камчаткаҕа дьиэ түннүктэригэр Аҕа дойду сэриитин кыттыылаахтарын дьоруойдарын мэтириэттэрин ууруохтара;

- Забайкальеҕа  дьоруой мэтириэтин аттыгар чүмэчи уматыахтара. Маннык көҕүлээһини эмиэ Ленинград уобалаһыгар уонна Санкт-Петербурга ыытарга кэпсэтии барар;

- Курган мэра хас биирдии киһи кыбартыыратын балконугар тахсан аахсыйаҕа кыттарыгар сүбэлиир. Кини этиитин  Вологодскай уобалас губернатора уонна Екатеринбург куоратын мэрията өйүүллэр.

- Тулатааҕы уобаласка социальнай ситимнэргэ Кыайыы күнүгэр хаан уруу дьон мэтириэтин оннугар чугас аймах дьон сулууспалаабыт хаартыскаларын таһаарары  сүбэлииллэр. Оттон Алтай кыраайыгар биир халыыптаах хаартыска арааматын интэрниэттэн хачайдаан дьоруой мэтириэтин бэчээттиири сүбэлииллэр;

- Бурятияҕа интэриниэт нөҥүө араас интэриниэт-былаһааккаларга дьоруойдар туһунан иһитиннэриини таһаарарга ыйаллар;

- Новосибирскай уобалаһыгар сэрии кыттыыллаах дьиэ кэргэн устуоруйаларын видеоустууларын интэриниэт-көрдөрүүтэ ыытыллыаҕа;

- Чувашия баһылыгын солбуйааччы Олег Николаев олохтоохторун "Өлбөт үйэлээх полк" аахсыйатын чэрчитинэн, аймах-билэ дьонун туһунан кэпсээннэри устан социальнай ситимнэргэ таһаарарга ыҥырда;

- Пермь кыраайыгар тэрийээччилэр нэһилиэнньэҕэ бэтээрэни кытта түспүт хаартыскалары биитэр видеокэпсээннэрин анал хештэгтээх таһааралларыгар сүбэлээтилэр. Кинилэр этэллэринэн, ыйыллыбыт хештэгтээх таһаарыылар тутатына анал сайтка "Дьиэҕэ Өлбөт үйэлээх полк" диэн хомуурга киириэхтэрэ;

- Саха сиригэр "Өлбөт үйэлээх полк" аахсыйаны көрдөрөр-иһитиннэрэр хампаанньаларга ыытары сүбэлээтилэр. Оттон Дьокуускайга 2013 сыллаахха "Өлбөт үйэлээх полк" тэрийээччи «Якутск вечерний» хаһыат эрэдээксийэтэ сэрии кыттыылаахтарын хаартыскаларын уонна ахтыыларын ыытар туһунан ыҥыраллар. Биһиги эрэдээксийэбит бүтүн өрөспүүбүлүкэтээҕи «ЯкутияПомнит/Саха сирэ умнубат»  анал бырайыакка хас биирдии киһи кыттарын көҕүлүүр уонна тэрийэр;

- Калининград куоракка бастакы куораттааҕы телеханаал бэйэтин сайтыгар онлайн-көрдөрүү ыытыаҕа. Олохтоохтор ханаалга сэрии кыттыылаахтарын, бэтэрээннэр хаартыскаларын ыытыахтара.

- Сахалин уобалаһыгар сэрии дьоруойдарын туһунан иһитиннэриилэри “ОТВ-Сахалин” телеханаалга көрдөрүөхтэрэ. Ыам ыйын 9 күнүгэр, күн устата, сүүрэр суруйуунан сэрии кыттыылаахтарын ааттарын-суолларын таһаарары былааннаатылар.

Арассыыйа дьиэҕэ олорор, ол эрээри бэриммэт!

Оттон биһиги эрэдээксийэбит “ЯкутияПомнит/Саха сирэ умнубат”  анал бырайыак чэрчитинэн,  Саха сирин олохтоохторун бырайыакка көхтөөхтүк кыттан, Аҕа дойду Улуу сэриитин кыттыылаахтарын  туһунан ахтыыларгытын сайтка уган үйэтитиҥ диэн ыҥырабыт!   

Билигин эрэ буолбакка, сыл устата бүтүн өрөспүүбүлүкэтээҕи аахсыйаҕа көхтөөхтүк кыттаргыт кэрэхсэбиллээх диэн бэлиэтиибит.

Yakutia-pomnit.ru сайтка киирэн билсиҥ.  Ахтыыларгытын Адрес электронной почты защищен от спам-ботов. Для просмотра адреса в вашем браузере должен быть включен Javascript. электроннай почтаҕа күүтэбит.   Билсэр төлөпүөннэргит: 89644170467, 89618695654. Инстаграм: @yakutia_pomnit

Бары кыттыһан өрөспүүбүлүкэтээҕи өйдөбүнньүк кинигэни оҥоруоҕуҥ!