Быйыл Саха Өрөспүүбүлүкэтин судаарыстыбаннай суверенитетын туһунан декларация ылыныллыбыта 30 сылын туолар. 1990 сыллаахха Саха сирэ баҕа өттүнэн автономияттан аккаастаммыта уонна сайдар суолун бэйэтэ оҥостор эппиэтинэһи сүкпүтэ. Ол кэмҥэ баттаммыт Федеративнай дуогабар судаарыстыба үрэллиитин тохтоппута, итиэннэ федерализм, федерация субъектара тэҥ бырааптаах уонна судаарыстыбаннастаах буолар тускулларын олохтообута. Кэлин ити барыта Арассыыйа Конституциятын тиэкиһигэр киирбитэ.
Билигин Саха Өрөспүүбүлүкэтэ федеративнай судаарыстыба толору бырааптаах субъега буолар. Өрөспүүбүлүкэ судаарыстыбаннаһын күнүн бэлиэтээн туран, Арассыыйа Федерациятын норуоттара биир сомоҕо, дойду кыраныыссата бигэ буолууларын туһугар эппиэтинэһи сүгэрбитин, биһиэхэ, кэлэр көлүөнэҕэ Аҕа дойдуга иһирэх тапталы уонна ытыктабылы иҥэрэн хаалларбыт өбүгэлэрбит кэриэстэрин ытыктыырбытын билиниэх тустаахпыт.
Аны икки сылынан Саха Өрөспүүбүлүкэтэ төрүттэммитэ 100 сылын үөрэ-көтө бэлиэтиэхпит. Оттон бу соторутааҕыта биһиги биир дойдулаахтарбыт – спортсменнарбыт кыайыы көтөллөммүттэрэ, киинэ индустриятын диэйэтэллэрэ үрдүк ситиһиилэммиттэрэ, ону тэҥэ култуура уонна духуобунас сайдыыта о.д.а. көстүүлэр биһигини, өрөспүүбүлүкэ олохтоохторун, үрдүктэн үрдүккэ кынаттыыллар, үчүгэйгэ, кэрэҕэ сирдииллэр. Инникитин даҕаны бу курдук кимиилээхтик үлэлээн-хамсаан, биир санаанан салайтаран үүнүү-сайдыы суолун тутуһан олордохпутуна, өрөспүүбүлүкэбит өссө чэчириэҕэ, бигэ туруктаныаҕа, кыахтаах эрэгийиэн буолуоҕа диэн эрэнэбин!
Өрөспүүбүлүкэ олохтоохторугар чэгиэн-чэбдик доруобуйаны, улахан тапталы, дьолу-соргуну, этэҥҥэ буолууну уонна бары саҕалааһыннаргытыгар үрдүк ситиһиилэри баҕарабын!
Петр Гоголев, Саха Өрөспүүбүлүкэтин Ил Түмэнин Бэрэссэдээтэлэ
-
0
-
0
-
0
-
0
-
0
-
0
