Бу дьарыктара геоквантум дэнэр. Быһаарыыта маннык:   “Геоквантум -- это изучение и работа с дистанционным зондированием Земли, картографией, проектирование виртуальных карт местности”.

Ааспыт үөрэх дьылыгар оскуола оҕолоро, пандемиянан олорон хаалбакка, чинчийиилэрин тохтоппокко, ситимнээхтик үлэлээтилэр. Ол курдук, алын сүһүөх кылаастар Бэрт Ууһун нэһилиэгин температуратын кэтээн көрдүлэр. Быйылгы чинчийии көрдөрөрүнэн, Бэрт Ууһугар муҥутаан от ыйын 13 күнүгэр итийбит. Күннээх сиргэ +46 кыраадыска тиийэ итийэ сылдьыбыт. От ыйын саҕаланыытыттан атырдьах ыйын 8-с чыыһылатыгар диэри +30-тан тахса кыраадыска тиийэр куйаас күннэр турбуттар. Сайын устата биһиги нэһилиэкпитигэр ардах баара-суоҕа 6-та эрэ ибиирдээн ааспыт. Сирбит кууран-хатан, от үүнүүтэ быстар мөлтөҕүн, баһаарга сэрэхтээх сайын кэлэн ааспытын оҕолор күнү-дьылы бэлиэтэнэр дневниктэриттэн көрөн анаалыстаатылар, түмүк оҥордулар.

Орто сүһүөх кылаастар Бэрт Ууһун нэһилиэгин үөнүн-көйүүрүн чинчийдилэр. Кураан сайын буолан, аһыҥа тооппоро элбээн, оту сиэн, сири эрдэ саһардыбыт, тыа саҕатыгар олорор оҕолор хайа да сыллааҕар лыах элбээбитин, кырдаайы, бырдах аҕыйаҕын бэлиэтии көрбүттэр. Ону таһынан нэһилиэк эмтээх отун үөрэтэн, “Бэрт Ууһун эмтээх отторо” хомуурунньугу бэлэмнээн таһаарыахтаахтар.

Үрдүкү сүһүөх кылаас оҕолоро ирбэт тоҥу чинчийдилэр. 2017-18 сыллаахха наука академиятын Саха сиринээҕи салаатын ирбэт тоҥу үөрэтэр институтун үлэһиттэрэ сир анныгар метеорологическай датчигы холбоон барбыттара. Сыл аайы балаҕан ыйын бастакы чыыһылаларыгар институт научнай сотруднига Павел Яковлевич Константиновы кытта датчик көрдөрүүтүн усталлар. Бу аҕыйах сылынан улахан метеорологическай  ыстаансыйа тутуллан, үлэҕэ киириэхтээх.

Үрдүкү кылаастар экспедицияҕа сылдьаллар. Сиҥнэн түспүт, мууһа көстө сытар сирдэри, нэһилиэк ортотугар үөскээбит дүөдэлэри үөрэтэллэр. Быйылгыттан “Геоквантум” научнай лабораторияны тэрийэн, оскуола базатыгар үлэлэтэн эрэллэр. Сайын устата хомуйбут матырыйаалларын кыһын ол лабораторияҕа чинчийэн, дакылаат суруйан, НПК-ларга кыттыахтара.

Инники сорукпут -- оскуолаҕа цифровой эйгэни сайыннарыы,    “Геоквантум” IT оскуолатын арыйан, олоххо киллэрэн, үөрэх хаачыстыбатын тупсарыы.

                                                                             Марианна Петрова.