Ил Түмэн IV ыҥырыылаах Мунньаҕын дьокутаата, төрдүс ыҥырыыга Парламентарий дьахталлар кулууптарын салайааччы, Ил Түмэн бастайааннай сэкирэтээрэ, педагогическай наука хандьыдаата Оксана Винокурова этэринэн, элбэх оҕолоох ийэлэр көмөҕө ордук наадыйаллар.  

“Миэхэ уопсайа биэс дьахтар эрийэ сырытта. Сүрүннээн Дьокуускай куорат олохтоохторо. Үксүлэрэ элбэх оҕолоохтор. Бары да ыктарыылаах, уустук балаһыанньаҕа олороохтууллар эбит. Холобур, элбэх оҕолоох дьахтар инбэлиит оҕотун киин сиргэ үөрэттэрээри, куоракка киирбит. Бырапыыската улууска буолан, Дьокуускай куоракка инбэлиит оҕолорго көрүллэр 3000 солк. көмө харчыга хапсыбат эбит. Бэйэтэ үлэлээбэт, оҕотун көрөрүн-истэрин иһин босуобуйа эрэ ылар. Икки кыра оҕото эмиэ оскуола үөрэнээччилэрэ. Киниэхэ бородууктанан көмө оҥорорго диэн быһаардыбыт. Иккис дьахтар олус уустук балаһыанньаҕа киирбит. Икки оҕолоох эдэр ийэ ыарахан ыарыыга ылларан, сыл аҥара больничнайга олорор эбит. Түөс араага буулаан, үлэтигэр кыайан тахсыбакка, эмтэнии куурустарын ааһа сылдьар. Аҥардас хамнас алын кээмэйин ылар уонна ипотеканан ылбыт дьиэтигэр олорор. Ипотекатыгар баантан көрдөһөн, эрэй бөҕөнөн, кирэдьиитин төлүөхтээх күнүн-дьылын, бырыһыанын (реструктуризация) уларыттарбыт. Аны туран, өлүүлэһэн тутууга киирэн, онно балтараа мөл. солк. сүтэрбит. Албыннаппыт  өлүүлээхтэр испииһэктэригэр киллэрбиттэр эрээри, дьыалата быһаарылла илик. Онон биһиги СӨ бырабыыталыстыбатын бэрэссэдээтэлин солбуйааччы Кирилл Бычков аатыгар хадатаайыстыба уонна дьахтар үлэлиир сиригэр көмө оҥоруҥ диэн суруйарга быһаардыбыт. Үһүс дьахтарга бэйэм көмөлөһүөм. Инбэлиит оҕолоох, аҥардас оҕотун босуобуйатыгар олорор эбит.

Маннык хабаанннаах итии лиинийэни ыытар хайаан да наада. Кыһалҕалаах дьон урут да элбэх этилэрэ. Коронавирус дьаҥыттан балаһыанньа өссө сытыырхайда, араас ыарахан быһыыга-майгыга түбэспит дьон ахсаана өссө элбээтэ. Дьиэҕэ олоруу кэмигэр үлэлэрэ тохтоон, дьиэҕэ олорорго күһэллибит дьон, ордук кыра оҕолоохтор эбии дохуот киллэрэр кыахтара суох», -- диэн Оксана Винокурова билиһиннэрдэ.

Ити курдук парламентарий дьахталлар кулууптара дьону кытта киэһэ хойукка диэри  үлэлээтилэр. Норуот итэҕэллээхтэрэ хас биирдии дьону быһа гыммакка, кыһалҕаларын истэн, кыах баарынан көмөлөһө, өйүү сатыыллара хайҕаллаах дьыала.