СӨ Быһалыгын уонна Бырабыыталыстыбатын пресс-сулууспата иһитиннэриитинэн, бигэргэтиллибит быраабылалар быһыытынан өрөспүүбүлүкэҕэ  олорор уонна тастан киирээччи гражданнар социальнай дистанцияны (атын гражданнарга диэри 1 миэтэрэ итэҕэһэ суох) тутуһуохтаахтар, ону таһынан уопсастыбаннай миэстэлэргэ уонна уопсастыбаннай тырааныспардарга бу иодэбиллэр булгуччулаах буоллулар. Дьону таһыыга уонна таксинан таһаҕас тиэйиигэ бу ирдэбил тарҕаммат диэн бэлиэтэнэр. 

Ураты быраабылалар Дьокуускай, Жатай куораттарын, Өлүөнэ оройуонугар, Мэҥэ Хаҥалас улууһун Аллараа Бэстээх бөһүөлэгэр, Нерюнгри, Мииринэй уонна Алдан оройуоннарын олохтоохторугар бигэргэтилиннилэр, маны тэҥэ Алдан куоракка уонна Ленинскэй бөһүөлэккэ харантыын биллэриллибитинэн дьиэҕэ олоруу эрэсиимэ күүһүрэн биэрдэ. Бу ыйыллыбыт нэһилиэнньэлээх пууннарга үлэлэригэр сырыылартан атын олохтоохтор дьиэлэриттэн  тахсыа суохтаахтар. Маны таһынан бу ыйыллыбыт нэһилиэнньэлээх пууннарга мааска кэтэр булгуччулаах буолла, ол курдук, бүгүҥҥү күнтэн ыла  булгуччу мааскалаах сылдьыы эрэсиимэ үлэлээтэ. Уопсастыбаннай тырааныспардарга уонна таксиларга мааска кэтэр быраабыла быһыытынан булгуччу ирдэниллэр.

65 үөһэ аҕам саастаах дьон, ону таһынан хроническай ыарыылардаах уонна иммуноспрессия балаһыанньалаах сылдьар гражданнар дьиэҕэ олоруу эрэсиимин булгуччу тутуһаллара ирдэнэр. 

Тэрилтэлэргэ үлэһиттэр социальнай дистанцияны тутуһалларын хааччыйыахтаахтар, анал бэлиэлэри оҥоруохтаахтар, эбийиэктэргэ, тутууларга киирэр анал эрэсиимин олохтуохтаахтар. Ону сэргэ тэрилтэлэр үлэһиттэригэр уонна атын гражданнарга анаан куттал суох буолуутун хааччыйар үлэлэри, тэрээһиннэри ыытыы булгуччулаах. Ыйааҕынан бигэргэммит быраабылалар дьиэҕэ олоруу эрэсиимэ тохтуор диэри үлэлиэҕэ. Быраабылалары кэһии түмүгэр буруйданааччылар РФ административнай Кодексын 20.6.1. ыст. эппиэтинэскэ тардыллыахтара.  Сиһилии ыйыллыбыт СӨ Баһылыгын бигэргэппит ыйааҕын манна киирэн билсиэххэ сөп.

Санатар буоллахха, буолаары турар ыам ыйынааҕы бырааһынньыктарга дьиэҕэ олорор эрэсиими булгуччу тутуһуу ирдэнэр. Билигин тыаҕа тахсар араас тэрээһиннэри, күүлэйи, сынньалаҥы тохтотор хайаан да наада. Ыарахан ыарыы күн-түүн элбии турарын көрө-истэ сылдьан, бэйэҕитин туттунуҥ, чугас дьоҥҥутун харыстааҥ.