— Ытыктабыллаах учууталлар, төрөппүттэр уонна үөрэнээччилэр, устудьуоннар!  Саха Өрөспүүбүлүкэтин Үөрэҕин министиэристибэтин уонна тус бэйэм ааппыттан Билии күнүнэн эҕэрдэлиибин!

         Быйылгы үөрэх дьыла саҥа усулуобуйалаах саҕаланар. Ол да буоллар, үөрэх тохтообокко барыаҕа. Бары да маннык балаһыанньаҕа үөрэннибит, онон бу быстах кэмнээх ырахаттары этэҥҥэ туоруохпут диэн эрэнэбин.

Балаҕан ыйын 1 күнэ – олох саҥа түһүмэҕэр үктэнэр бэлиэ түгэн. Оскуолатааҕы уонна устудьуон сыллара саҥа арыйыыларынан, үөрүүнэн толору буолар уратылаахтар. Бүгүн оскуолаҕа 15 285 оҕо маҥнайгы кылааска киирдэ.

         Ытыктабыллаах педагогтар уонна үөрэхтээһин эйгэтин үлэһиттэрэ! Кыһамньылаах үлэҕит иһин махтанабын. Эһиги уустук эрээри, олоххо саамай туһалаах идэни талбыккыт.

Күндү үөрэнээччилэр уонна төрөппүттэр! Эһиги бу күнү олус күүппүккүт. Чахчыта да, оскуола сыллара -- киһи олоҕун саамай чаҕылхай кэмнэрэ. Умсугуйан туран үөрэнэргитигэр баҕарабын! Оттон төрөппүттэргэ тулууру уонна уҕараабат эрчими!

         Маҥнайгы кылааска киирбит кырачаан оҕолорбут! Эһиэхэ олоххут саҥа кэрдиис кэмэ саҕаланна, оскуола диэн иккис дьиэлэннигит, үөрэнээччи диэн буоллугут. Оскуолатааҕы кэмҥит хас биирдии түгэнин сыаналыы үөрэниҥ, ол кэлин үтүө өйдөбүл буолан хаалыа.

         Устудьуон доҕотторбут! Эдэр саас аргыстаах устудьуон сыллара ханнык баҕарар киһиэхэ олоҕун саамай кэрэ кэмэ буолар. Бу кэмҥэ эһиги билиигит хаҥыыр-кэҥиир, тапталгытын көрсөҕүт, бастакы дьоһуннаах быһаарыныылары ылынаҕыт. Ол иһин бу кэрэ кэмҥит чаҕылхай буоллун!

         Барыгытыгар ситиһиилээх үөрэх дьылын!