Кумахтаах уонна олус түргэн сүүрүгэ суох сири булар уустук эбит. Ол да буоллар, бэлэсипиэт абыраллаах көлө. Суолтан-иистэн иҥнибэккэ, онно-манна батыллыбакка, араас сири булуохха сөп.

Чэ, быһата уонча биэрэстэлээх сиринэн ылан көрдөххө маннык:

• 202 микрорайон, аналлаах сөтүөлүүр сир (пляж). Дьокуускай сөтүөлүүр сирэ ыыб-ыччары киһи, этэргэ дылы, кыбыллан киирэн, уу кэстэххэ махтал.
• “Велопляж”. Маннык ааттаах сиргэ 202 мкр даамбатынан бара түһэн баран, хаҥас диэки түһэҕин, хочо устун түөрт биэрэстэ курдук ииччэх-бааччах суолунан айаннаан, боротуокаҕа тиийиллэр. Манна уута ыраас, балачча киэҥ сир кумахтаах.
• Даркылаах. Манна боруомунан уҥуор туоруур сиртэн салгыы бараат, уҥа диэки туоруугун. Олус киэҥ сир кырылас кумах. Уута олус ыраас. Ол да буоллар сүүрүктээх. Манна саамай үчүгэйэ диэн кыра кыра чычаас көлүччэ курдук уулардаах. Оҕо-аймахха саамай табыгастаах.
• Пригороднай. Манна уута дириҥ, оҥхой сирдэрдээх. Кумахтаах сирэ аҕыйах. Ол да буоллар, дьон хото сылдьар.
• Петуховка. Саамай элбэх киһи ууга былдьаммыт сирэ диэн үгүс дьон салла ааттыыр. Ол да буоллар сөрүүн ууга чомполонуох киһи ахсаана манна күннэтэ элбии турар.

Манна даҕатан, айылҕаҕа сылдьыы быраабылаларын санатар кэрэх. Ууга сэрэхтээх буолуҥ, оҕолоргутун харах далыгар илдьэ сылдьыҥ. Итирдэр утаҕы иһимэҥ. Бөххүтүн-саххытын бэйэҕитин кытта илдьэ барыҥ. Айылҕабытыгар, дьоҥҥо-сэргэҕэ харыстабыллаах сыһыан баар буолуохтааҕын умнумаҥ.

Массыыналаах дьон ыраата барар кыахтаах.