“Саха сатаабатаҕа суох” диэн дэлэҕэ этиэхтэрэ дуо? Амма улууһун Бөтүҥ нэһилиэгин олохтооҕо Иннокентий Слепцов бэйэтигэр чааһынай бассейн тутан үгүс дьону сөхтөрөн турардаах.

Иннокентий идэтинэн уус. Кини оҥорбут спортивнай была­һааккалара, бэсиэдкэлэрэ,  араас тутуулара Аммаҕа, атын да улуустарга элбэх ыал, тэрилтэ тэлгэһэлэрин киэргэтэллэр. Бассейнын аттыгар  «Сандаарар КҮН» диэн олус кэрэ ааттаах мастарыскыайдаах. Онно тупсаҕай моһуоннаах  миэбэллэрин оҥорон, бар дьону үөрдэр, сөхтөрөр.

«Ювелир-худуоһунньук идэтигэр үөрэммитим. 2008 сыллаахха Дьокуус­кайдааҕы ойуулуур-дьүһүннүүр училищены бүтэрбитим. Бастаан үлэ уруогун учууталынан ананан, оскуолаҕа үлэлии киирбитим. Дьоҕус мастарыскыай оҥостон, 2009 сыл сэтинньититтэн урбаанньыт буоларга быһаарыммытым. Кыра оҕо олоппоһун оҥорууттан саҕалаан дьиэ тутуутугар тиийэ үлэлээн барбытым, онтон 2016 сылтан  күүскэ  ылсан барбытым”, - диэн Иннокентий Слепцов кэпсиир.

Бассейны тутуу

«Мастарыскыайым таһыгар 8х6-лаах бассейн каркааһын түһэрбиппит. Сир тымныы тыына ууга охсубатын диэн анныгар пенофол уонна хаптаһын тэлгээбитим. Салгыы каркааһын баайыытын саҕалаабыппыт. Муостатын саайан баран, кырыыһатын поликарбонатынан оҥорбутум. Сайын куйааска күҥкүйэн хаалбатын диэн, сөрүүкэтэр сыаллаах биир эркинигэр чараас хаптаһынынан түннүктээн биэрбитим. Бассейн иһигэр уонна таһыттан сылытар оһохтоох», — диэн уус үлэ хаамыытын кэпсиир.

Бассейн бөҕө-таҕа буоллун диэн пластигы бүтэйдии иһэрдэн оҥорбуттар. Анныгар ууну сүөкүүр кырааны иһэрдэн олордубуттар. Иннокентий этэринэн, маннык матырыйаал үйэлээх буолар. «Ууну массыынанан бастаран куттарабын, уопсайа 20 куб. уу ороскуоттанар. Бассейн уута түргэнник буорту буолар. Онон уутун сотору-сотору уларытар, ыраастыыр ирдэнэр. Биһиги күүстээх носуоһунан хачайдаан, анал фильтр нөҥүө ыраастыыбыт уонна  анал хлордаах эми туттабыт. Оччоҕуна өр ып-ыраас турар. Итиэннэ бу фильтр ууну эмиэ сылытар», -- диэн быһаарар.

Бассейн ааптара тутуутун салгыы сайыннаран, баанньыктаах гына оҥорбут. Сайынын сылаас уулаах душ туппут.

Сүрүн көмөлөһөөччүлэрэ --  дьиэ кэргэнэ

Слепцовтар элбэх оҕолоох ыал. Ыал аҕа баһылыгын сүрүн көмөлөһөөччүлэрэ кэргэнэ уонна оҕолоро буолаллар.

«Түөрт оҕолоохпут. Саамай өйүүр, көмө­лөһөр дьонум кэргэним, оҕолорум буолаллар. Улахан уолум эр киһи үлэтин тэҥҥэ үлэлэһэр. Кыра уолум, туйах хатарааччым.  Улааттаҕына бу мастарыскыайы салгыы үлэлэтэр баҕалаах. Базаҕа миигин кытта барсар, илии-атах буолан көмөлөһөр”, -- диэн Иннокентий уолаттарын хайгыыр.

Быйыл бассейн өссө тупсубут, эбии баанньыктаах, сылаас уулаах душтаах. Оҕолор күн аайы сөтүөлээн, суунан-тараанан үөрүүлэрэ үгүс.

Дэгиттэр уус

Иннокентий миэбэл бары көрүҥүн оҥорор. Сүрүннээн дьон киниттэн остуол, олоппос кэмпилиэгин сөбүлээн үлэһэр. Онон манна күүскэ ылсан үлэлээбитэ быданнаабыт. Быһа холоон, 2018 сылтан 50-ча кэмпилиэги оҥорбутум буолуо диир.

Кини оҥорбут миэбэлин сүрүн уратыта диэн, бэс мастан былыргы технологиянан уһанар эбит. Ол аата биир да тоһоҕото суох. Арай, бөҕө буоллун диэн хаачыстыбалаах килиэйи туһанар. Тыа сиригэр маннык ньыманы туһунар, маннык үлэлиир дьон аҕыйах.

Иннокентий Слепцов инникитин туох былааннааҕын, идеялааҕын туоһуластыбыт. «Мин биир сүрүн идиэйэбинэн өрөспүүбүлүкэ уустарын мунньан, маастар-кылаастары, уопут атастаһыытын ыытар баҕалаахпын. Онно анаан-минээн ити баазабын дьон-сэргэ кута-сүрэ тохтуур, сэргэхсийэр гына табыгастаахтык, сиэдэрэйдик оҥостор былааннаахпын. Бэйэм ювелир идэтигэр үөрэммитим. Уһаныы бары көрүҥүн боруобалаан,  дьоҕурбун салгыы сайыннара сатыыбын. Ити идиэйэбэр үп-харчы өттүнэн сөптөөх өйөбүл баара буоллар, олоххо түргэнник киллэриэм этэ», -- диэн Иннокентий Слепцов баҕа санаатын үллэстэр.

Оҕолор санаалара

Георгий, 16 саастаах:

--Бассейны аҕабынаан 8-с кылааска үөрэнэ сырыттахпына, биир ый устата тутан киллэрбиппит. Аҕам мындыр өйдөөҕө уонна биһиэхэ кыһаллара бу билигин баар бассейнмытыттан да көстөр. Кини сыл аайы бу үлэлиир, сайылыыр базабытыгар кыра-кыралаан тугу эрэ саҥаттан саҥаны оҥорон киллэрэн иһэр. Онно көмөлөһөн, мин элбэххэ үөрэнэбин. Холобур, быйыл тэпилииссэ туппуппут. Аҕам элбэххэ үөрэтэр.

Дархан, 11 саастаах:

--Уһун кыһын устата бассейыммытыгар сөтүөлүүрбүн күүтэбин. Сөтүөлүөхпүт иннинэ уутун аҕам оҥорбут пылесоһунан оботторобут. Уонна икки оһоҕу оттобут. Күһүн сөтүөлүүр олус үчүгэй. Сайын өссө да бүтэ илик курдук.

Сандаара, 12 саастаах:

--Аҕам уус буолан уонна биһиэхэ кыһаллан, убайбынаан Георгийдыын уонна ийэм буолан, бассейнмытын оҥорбуттара. Бассейннаах наһаа үчүгэй. Баҕар, киэһэ адьас хойукка диэри, баҕар, сарсыарда эрдэттэн хаһан баҕарбыппытынан сөтүөлүүбүт. Быйыл баанньыктаммыппыт өссө үчүгэй. Сөтүөлүөхпүт иннинэ суунабыт,  онтон бүтэн баран, сылаас уунан эмиэ сайҕанабыт.

Күннэй, 4 саастаах:

--Мин бассейнмар анал «төгүрүктээх» эрэ сөтүөлүүбүн. Бассейнмын олус таптыыбын. Элбэх буолан сөтүөлээтэххэ өссө үчүгэй буолар.