«Дистанционнай үөрэххэ көһөргө күһэллиинэн сибээстээн, ордук элбэх оҕолоохторго итиэннэ ноҕурууска олус улааппытынан, дьиэ кэргэттэргэ быһыы-майгы балачча уустук. Биһиги педагогтар оҕолорго биирдиилээн сыһыаннаһалларыгар, ордук кыра кылаас оҕолоругар онлайн үөрэҕи аһара ирдээбэттэригэр сүбэлиибит», — диэтэ социальнай ситимнэргэ быһа эфир кэмигэр миниистир.
Владимир Егоров иһитиннэрбитинэн, билигин оффлайн (Интернетэ суох. – Ред.) туһатыгар онлайн үөрэхтээһин намтааһына барар. Маныаха оҕо 3% ордуга дистанционнай үөрэхтээһин кыаллыбат ыраах сытар нэһилиэнньэлээх пууннарга сирэй дьарыктанар.
«Дьиэ кэргэҥҥэ оҕо элбэх буоллаҕына, кыра кылаас оҕолоро учуобунньуктарынан уонна босуобуйаларынан үөрэнэллэрэ уонна үксүн айар сорудахтарынан, ааҕыынан уонна суругунан дьарыктаналлара ордук буолуо этэ. Биллэн турар, үрдүкү кылаастарга оскуола бырагырааматын толору баһылыыллара наадалаах, онон манна, чахчы да, быһыы-майгы тыһааҥыннаах», — диэтэ миниистир.
Үөрэҕи ситиһии туһунан этэригэр, Владимир Егоров саамай кылаабынайынан оҕо доруобуйата буоларын, онон, кинилэри ноҕуруускаттан арыый босхолуур итиэннэ биирдиилээн үөрэтэр бырагыраамаларга көһөр наадалаах буолуоҕун бэлиэтээтэ. Онлайн көрүҥүнэн уруоктар сарбыллыахтаахтар итиэннэ санитарнай уонна педагогическай нуормаларга сөп түбэһэн, 30 мүнүүтэттэн кыра буолуохтаахтар.
-
0
-
0
-
0
-
0
-
0
-
0
