Туох баар библиотекалар, кулууптар, мусуойдар онлайн эрэсиимигэр көһөн үлэлии олороллор.

Ол курдук, Мэҥэ-Хаҥаластааҕы библиотека ситимин Балыктаахтааҕы филиала муус устар 6 күнүттэн эмиэ дьиэҕэ олорон эрэ дистанционнай үлэтин саҕалаабыта.

Билиҥҥи интернет үйэтигэр библиотекарь Сардаана Трифонова нэһилиэк дьонугар, ааҕааччыларыгар социальнай ситим нөҥүө күннэтэ араас тиэмэҕэ наадалаах иһитиннэриини, электроннай библиотекаларга, архыыптарга, ютуб ханаалларыгар уо.д.а. сигэниини ыытан, нэһилиэк дьонун сэргэхситэр. Муус устар 10 күнүттэн дьону дьиэөэ олороллоругар көҕүлээн, нэһилиэккэ #сидимдома# “Дьиэбитигэр ааҕабыт” диэн акция биллэрбитэ. Манна билигин ким ханнык кинигэ, хаһыат, сурунаал ааҕа сылдьарын хаартыскаҕа түһэрэн ыыталлар, ону библиотека Инстаграм страницатыгар таһаарыыны саҕалаабыта. Бу акциянан улуус атын библиотекаларыгар ыҥырыы таһаарбыта.

Маны таһынан, бэлиэ күннэргэ сөп түбэһиннэрэн сонуннары, Кыайыы 75 сылыгар аналлаах "Буойун-суруйааччы Тимофей Сметанин",  Россияҕа анимация күнүгэр аналлаах викториналары, оҕолорго уруһуй күрэҕин ыытар. Сахалыы өс хоһооннорун, таабырыннары, тыллары таайтарар.

"Айар куттаах Балыктаах" диэн Мэҥэ нэһилиэгин "Иэйии кытыла" хоһоонньуттарын айар түмсүүтүн кинигэтин оцифровкалаан, интернет ситимигэр таһаарда.

Сынньалаҥ киинин үлэһиттэрэ, дириэктэр Любовь Кычкина бассаабынан, Инстаграмынан нэһилиэк олохтоохторугар араас күрэхтэри тэрийэллэр, туһалаах сүбэлэри ыытыһан дьону сэргэхситэллэр.

Балыктаах олохтооҕо Мария Захарова этэринэн: “Маннык тэрээһиннэр уустук кэмҥэ дьону сэргэхситэр, түмэр аналлаахтар. Саамай үчүгэйэ диэн, ити тэрээһиннэргэ, ыытыллар күрэхтэргэ бөһүөлэккэ олорооччулар уонна ыраах да сирдэргэ олорор биир дойдулаахтарбыт көхтөөхтүк кытталлар”.

Дьиэҕэ олорон дьон муунтуйара, араас санаа үүйэ-хаайа тутара баар суол. Култуура эйгэтэ дьону-сэргэни кэрэҕэ, үтүөҕэ, сырдыкка тардар, ыарахан кэмҥэ күүс-көмө буолар аналлаах.