Маҕан бөһүөлэгин олохтооҕо редакциябытыгар бэйэтэ түһэрбит хаартыскатын ыытта. Кини сэлиэнньэ таһыгар ойуурга дьаарбайа тахса сылдьан, бу маннык хартыынаны көрөн хараастыбыт.

СӨ Экологияҕа министиэристибэтэ иһитиннэрбитинэн, солколоох үрүмэччиттэн Дьокуускай таһынааҕы бөһүөлэктэр ойуурдара күүскэ эмсэҕэлээн эрэллэр – Табаҕа, Покровскай трага, Бүлүү трага, Тулагы-Киллэм нэһилиэк уонна Маҕан бөһүөлэгэ. Бу үөн Дьокуускай таһынааҕы ойууру сиэбит иэнэ 38890,4 га тэҥнэспит. Оттон өрөспүүбүлүкэ үрдүнэн солколоох үрүмэччи тарҕаммыт иэнэ 54 тыһ. гектар буолбут.

Биэдэмэстибэ үлэһиттэрэ быһаарбыттарынан, солколоох үрүмэччи үөскүүрүгэр, тарҕанарыгар кураан сайын уонна баһаардар төрүөтүнэн буолаллар. Бу үөннэри химическай препараттары ыстаран суох гыныахха сөп. Билигин солколоох үрүмэччи хаатыттан тахса илигинэн, маннык эмтэн эмсэҕэлээбэт. Онон ойууру харыстааһыҥҥа үлэлиир тустаах тэрилтэ эмтээһин үлэтин от ыйын ортотуттан саҕалыыр туһунан биллэрбит.

Санатар буоллахха, кэлиҥҥи сылларга солколоох үрүмэччиттэн ойуур үгүстүк эмсэҕэлээбитэ. 1999-2003 сс. үлүгэрдик тарҕанан, Саха сирин ойуурун 8 мөл. га сиригэр баар мутукчалаах маһын кэбирэппит.