«РФ Президенин Анал этиитин олоххо киллэрии иһинэн бу биир сүрүн сорукпут буолар. Судаарыстыба баһылыга бу уларыйыылар 2020 сылга төрөөбүт оҕолордоох дьиэ кэргэҥҥэ көдьүүстээх буолалларын ситиһэрбитигэр сорук туруорбута», — диэн Госдума спикерэ Вячеслав Володин эппит.
Сокуоҥҥа ханнык уларыйыылар киирдилэр?
2020 сылга диэри ийэ хапытаалын бырагырааматынан иккис уонна онтон үөһэ оҕо төрөөтөҕүнэ эрэ сертификат бэриллэрэ. Оттон Президент Анал этиитин кэнниттэн оҥоһуллубут көннөрүүлэринэн, ийэ хапытаалын бастакы оҕо эмиэ ылар бырааптанна.
Ол курдук, ийэ хапытаалын үбүн кээмэйэ 2020 сыл тохсунньу 1 күнүттэн бэттэх бастакы оҕо төрөөтөҕүнэ эбэтэр оҕону иитэ ыллахтарына 466 617 солк. тэҥнэһэр. Дьиэ кэргэҥҥэ иккис оҕо төрөөтөҕүнэ ийэ хапытаала 150 тыһ. солк. улаатар уонна 616 617 солк. тэҥнэһэр.
Өскөтүн иккис уонна онтон үөһээ оҕолоро 2020 сылтан бэттэх төрөөтөхтөрүнэ, хапытаал үбүн кээмэйэ 616 617 солк. буолар.
Өскөтүн иккис уонна онтон үөһээ оҕолор 2019 сыл ахсынньы 31 күнүгэр диэри төрөөбүт буоллахтарына, ийэ хапытаалын кээмэйэ — 466 617 солк.
Ийэ хапытаала сылын аайы индексацияланар. Бастакы оҕоҕо төлөбүрү аҕа эмиэ ылыан сөп, өскөтүн кини оҕоҕо соҕотох төрөппүт буоллаҕына.
Ийэ хапытаалын сөртификатын түргэнник биэриэхтэрэ
Пенсионнай фондаҕа төрөппүт биэрбит сертификатка сайаапката биэс күн эрэ иһигэр көрүллэр буолуоҕа. Урут сертификаты биэрэр туһунан быһаарыыны ылынарга 15 күн бэриллэрэ. Ханнык эрэ сибидиэнньэни чопчулааһын ирдэннэҕинэ, бу болдьох 15 күҥҥэ диэри уһатыллар (урут биир ый этэ). Ийэ хапытаалын ылааччытыгар биир үлэ күнүн кэнниттэн сертификат бэриллэрин туһунан быһаарыыны иһитиннэриэхтээхтэр.
Ийэ хапытаалын үбүн ханнык хайысхаҕа туһанар туһунан сайабылыанньаны урукку курдук биир ый устата буолбакка, сайабылыанньа киирбит күнүттэн 10 үлэ күнүн устата көрүөхтээхтэр. Эбии докумуон ирдэнэр буоллаҕына, бу болдьох 20 күҥҥэ диэри уһатыллар.
Ийэ хапытаалын дэбигис ылыахтара
Ийэ хапытаалын ылаары дьиэ кэргэн докумуоннары хомуйбат, олорор сирдэрин бигэргэтэр ыспыраапканы аҕалбат буолла. Пенсионнай фонда судаарыстыбаннай информация тиһигиттэн ирдэнэр информацияны бэйэтэ ылар.
Ийэ хапытаалын бырагыраамата биэс сыл уһатылынна — 2026 сыл ахсынньы 31 күнүгэр диэри.
Ийэ хапытаалын үбүн туһаныы
Үп көмөтүнэн дьиэ кэргэн дьиэ туттуон эбэтэр дьиэтин өрөмүөннэниэн сөп. Урут дьиэни «ИЖС» категориялаах учаастаакка эрэ туттуохтарын сөбө, билигин даача сиригэр эмиэ туттуохтарын сөп буолла.
Сардаана КУЗЬМИНА
-
0
-
0
-
0
-
0
-
0
-
0
