Ол курдук, саҥа коронавирус ыарыыта булуллубут уонна итинник ыарыыга сыстар кутталлаах дьоҥҥо медицинскэй көмөнү оҥорор эмчиттэргэ үлэлэрэ ураты усулуобуйалааҕын уонна эбии ноҕуруускаланалларын иһин федеральнай бюджеттан көҕүлүүр харчынан төлөбүрдэри НДФЛ-тан босхолуур докумуон баар буолла.

Ити сокуоҥҥа COVID-19 ыарыыттан көмүскэнэр сириэстибэлэри атыылаһар хампаанньаларга нолуокка көҕүлээһиннэр тустарынан нуормалар эмиэ бааллар. Бу докумуон официальнайдык иһитиннэриигэ таһаарыллыаҕыттан күүһүгэр киириэхтээх итиэннэ 2020 сыл тохсунньу 1 күнүттэн үөскээбит быраап сыһыаннаһыыларыгар тарҕатыллыаҕа.

Ыарыһахтары кытта үлэлиир эмчиттэр төлөбүрдэри илиилэригэр “ыраастык” ылалларын туһунан Россия президенэ Владимир Путин муус устар 15 күнүгэр эппитэ.

COVID-19 ыарыылаах дьоҥҥо медицинскэй көмөнү оҥорууну кытта быһаччы сибээстээх доруобуйа харыстабылын үлэһиттэригэр ураты усулуобуйаҕа үлэлииллэрин иһин 2020 сыл муус устар 1 күнүттэн бэс ыйын 30 күнүгэр диэри федеральнай бюджеттан хамнастарыгар эбии төлөбүрү анааһыны хааччыйар нуормалыыр правовой аакталарга уларытыылары киллэрэригэр В.Путин бырабыыталыстыбаҕа сорудахтаабыта.

Коронавирус ыарыылаах дьону кытта быһаччы балыыһаларга үлэлиир быраастарга итинник эбии төлөбүр ыйга 80 тыһыынча солк., орто медицинскэй үлэһиттэргэ – 50 тыһ., аччыгый медицинскэй персоналга – 25 тыһ.солк.

Суһал көмө быраастарыгар бу түгэҥҥэ эбии төлөбүр ыйга 50 тыһ. солк., оттон орто уонна аччыгый медицинскэй персоналга — 25 тыһ. солк.