Сокуон барылын оҥорон киллэрбит Госдума дьокутаата Павел Крашенинников эппиэкэ уоргана дьиэ кэргэн олоҕор кыттыһара сороҕор төрүөтэ суох буоларын уонна кырдьык көмөҕө наадыйар дьиэ кэргэн болҕомтото суох хааларын туһунан эппит. Эппиэкэ уоргана оҕону төрөппүттэриттэн суолтата суох биричиинэнэн былдьаан ыларын ыйар. Холобур, оҕо оонньуура аҕыйаҕын, оҕо ытыырын, оҕо туспа хоһо суоҕун, оҕону эбэтин, эһэтин кытары хаалларбыттарын төрүөт оҥостор.
“Араас түбэлтэлэр бааллар. Кыһалҕалаах ыал судаарыстыбаннай уорганнарга көмөҕө наадыйан таҕыстаҕына, бу ыал эппиэкэ уорганын болҕомтотугар ылыллар. Дьиэ кэргэн кодексын 77 ыстатыйатын сиэртибэтинэн буолаллар. Ол эбэтэр үп өттүнэн кыһалҕалаах ыалтан оҕону административнай бэрээдэгинэн ылаллар”, -- диэн дьокутаат санаатын эппит.
Сокуон барыла судаарыстыбаннай уорганнар сокуону кэһии, буруйу оҥоруу таҕыстаҕына, оҕо доруобуйатыгар куттал үөскээтэҕинэ эрэ дьиэ кэргэн олоҕор кыттыһары көҥүллүүр. Ол курдук, бу кэһиилэри суукка көрөн, тустаах түмүк таһааран баран, дьиэ кэргэнтэн оҕону ылары мэктиэлиир. Эппиэкэ уоргана эбэтэр ис дьыала уорганнара оҕо доруобуйатыгар куттал суоһуурун туһунан иһитиннэрии ыллахтарына суукка сайабылыанньа биэрэллэр. Сайабылыанньаны 24 чаас иһигэр көрүөхтээхтэр, сууд мунньаҕар эпиэкэ уорганын, прокуратура бэрэстэбиитэллэрэ уонна төрөппүттэр баар буолуохтаахтар. Суут сабыллыылаах ньыманан ааһар.
-
0
-
0
-
0
-
0
-
0
-
0
