--Коронавирус дьаҥа сир үрдүттэн 2 мөлүйүөнтэн тахса киһини илдьэ барда. Биһиги өрөспүүбүлүкэбититтэн 500-тэн тахса киһи өлбүтэ хомолтолоох, дириҥ кутурҕаммын дьонноругар тиэрдэбин. 

 Федеральнай киинтэн 7,5 млрд солк. уонна өрөспүүбүлүкэ бүддьүөтүттэн 3,5 млрд солк., ол аата барыта холбоон 11 млрд солк. бу ыарыыны утары охсуһууга көрүллүбүтэ. 2020 сыллаахха 5 млрд. солкуобайтан тахса харчы урбаанныттары өйүүр сыаллаах миэрэлэргэ тыырыллыбыта. Үлэтэ суох хаалбыттар көмө харчы ылбыттара. 2021 сылга оҕолоох ыалларга бэриллэр көмө харчы уопсай суумата 10 млрд солкуобайтан 12 млрд солкуобайга диэри улаатта. “АЛРОСА” хампаанньа тэрилтэлэрэ баар улуустарыгар 800 мөл. солк. суумаҕа медицинскэй оборудованиелары, эмп-том ылан биэрдэ. Доруобуйа харыстабылын салаата көдьүүстээхтик үлэлиирин көрдөрдө. Кылгас кэм иһигэр инфекционнай балыыһалары 3100 куойкаҕа тиийэ тэниппиппит. Балыыһаларга 2300 медицинскэй тэрил ылылынна: ИВЛ-лар, КТ-лар, рентген аппарааттара, УЗИ-лар, о.д.а. Өскөтүн пандемия саҕаланыытыгар 2 лабораторияҕа  сууккаҕа 300 эрэ анаалыс оҥоһуллар эбит буоллаҕына, билигин 16 лабораторияҕа күҥҥэ 10 тыһыынчаттан тахса чинчийиини ыыталлар. Барыта 800 тыһыынчаттан тахса киһини анаалыстаатылар. Медиктэр хорсун үлэлэрин көрдөрдүлэр. Ону тэҥэ Роспотребнадзор, социальнай харалта, бэрээдэги көрөр-истэр тэрилтэлэр үлэһиттэрэ, волонтердар эмиэ.

Ол эрээри билигин да хамсык букатын симэлийэ илик. Онон муҥутуур сэрэхтээх буолуу эрэсиимэ ый бүтүөр диэри хаалар. Арассыыйа бастакынан COVID-19 утары вакцинаны айан, биһиги бастакынан босхо быһыыны ылар кыахтаахпыт. Онон бары күргүөмүнэн вакцинация ыларгытыгар көрдөһөбүн. Бу ыарыы содула өссө үөрэтиллэ илик. Онон бэйэбитин харыстыаххайыҥ, көмүскүүр быһыыны туруортарыаххайыҥ. Чуолаан 65 саастарын ааспыт дьон уонна олохсуйбут ыарыылаахтар. Билиҥҥитэ 55 тыһыынчаттан тахса киһи вакцинацияланна. Сүктэриллибит эбээһинэспинэн нэһилиэнньэ доруобуйатын туһугар эппиэтинэстээхтик сыһыаннаһабын уонна оннугу муниципальнай тэриллии баһылыктарыттан, тэрилтэ салайааччыларыттан ирдиибин.

Балтара ый буолла ыарыыбыт намыраан эрэрэ. Онон кулун тутар 15  күнүгэр хааччахтааһын кэккэ миэрэлэрин сымнатарга ыйаахпын таһаарбытым. Ол курдук, кэмпириэнсийэлэри, форумнары, онтон да атын култуурунай-сырдатар тэрээһиннэри ыытары, тыйаатырдар 75 бырыһыан  көрөөччүнэн туолууларын, пааркалар үлэлииллэрин, атыы-эргиэн кииннэрин дезинфекциялааһыны талбыт кэмнэригэр ыыталларын көҥүллээтим.

Урукку олохпут  укулаатыгар сыыйа төннөн эрэбит. Бары вакцинацияланнахпытына, ол өссө түргэтиэ этэ. Бука бары эппиэтинэстээхтик сыһыаннаһан, мааскабытын кэтэ сылдьыаххайыҥ, социальнай арыты тутуһуоххайыҥ, алтыһыыны аччатыаххайыҥ.

Күндү бар дьонум! COVID-19 дьаҥа биһигини барыбытын тулуурдаах буолууга тургутан көрдө. Күүстээх санаалаах, түмсүүлээх, бэйэ-бэйэбитин өйөһөр буоламмыт, хаһан да көрсүбэтэх моһоллорбутун туораан эрэбит. Чэбдигирии сылыгар өссө ордук сомоҕолоһон, бэйэбитигэр уонна дьоммутугар харыстабыллаахтык сыһыаннаһыаххайыҥ. Эһиги эр санааҕытыгар махтанабын, чэгиэн-чэбдик буолуҥ!