Саха сирин бастыҥ аһылыктара – балык, убаһа этэ, саха боруода ынах үүтүттэн арыы, сир аһа, өлүөхүмэ сыыра, таба паантата эбииликтээх чэбдигирдэр утах, “Саха сиригэр бултааһын уонна балыктааһын” диэн сөрүүн чэй уонна “Якуцкий” кыбаас бу куонкуруска кыттыахтара. Ол туһунан өрөспүүбүлүкэ тыа хаһаайыстыбатын пресс-сулууспата иһитиннэрэр.

Куонкуруска кыттыы улахан кэскили саҕар. Өрөспүүбүлүкэҕэ оҥоһуллар бородуукта Арассыыйа ырыынагар тахсар кыахтанар. “Биһиги сорукпутунан Саха сиригэр оҥоһуллар экологическай уонна доруобуйаҕа туһалаах астары кытары билиһиннэрии буолар. Биһиги ураты аспыт – саха балыга, убаһа этэ уонна сир аһа киэҥник биллэр эбит буоллахтарына, саха боруода ынах үүтүттэн арыыны билиҥҥитэ амсайа иликтэр элбэхтэр. Бу бородууктаны “Саха ынаҕа” тэрилтэ быйыл таһаарда. Саха боруода сүөһү үүтэ, этэ туһалааҕа науканан дакаастаммыта, битэмиинэ атыттардааҕар быдан элбэх. Оттон таба паантата эбиилээх чэбдигирдэр утах эмиэ саҥа бренд буолар. Бу эмиэ доруобуйаҕа туһалаах ас. Өлүөхүмэ сыыра эмиэ биир киэн туттар бородууксуйабытынан буолар. Сотору куоластааһын саҕаланыаҕа. Көхтөөхтүк кыттаргытыгар ыҥырабын”, -- диэн тыа хаһаайыстыбатын миниистирэ Александр Атласов эппит.

Сэтинньи 19 күнүттэн ахсынньы 2 күнүгэр диэри вкусыроссии.рф саайтыгар куоластааһын биллэриэхтэрэ.

Куонкуруска кыайбыттар РФ тыа хаһаайыстыбатын министиэристибэтэ тэрийэр үлэлэрин былааныгар киириэхтэрэ уонна киэҥ атыыга тахсарыгар үлэ барыаҕа.