Билиҥҥи туруган Орто Халыма улууһугар биэс баһаары умулларыыга үлэ ыытыллар. Уоту умулларыыга 166 киһи, 14 техника үлэлиир. Бэҕэһээ Орто Халыматтан бөртөлүөтүнэн ЫБМ аэромобильнай бөлөҕө көтөн кэлэн, Сыбаатай сэлиэнньэтин таһыгар чугаһаабыт уоту умуруордулар.

Билигин Алакы-Күөл сэлиэнньэтин таһыгар 75 га сиргэ уот күөдьүйэр, ону умуруорууга 70 киһи, 3 техника үлэлиир. Аргахтаахтан 45 км. сиргэ умайар ойуур баһаарын 20 киһи, 3 техника умуруорар. Эбээх сэлиэнньэтиттэн 10 км сиргэ уот турбут, умуруорууга 9 киһи, 8 техника үлэлиир. «Ааспыт ыйтан баһаары умуруоруу үлэтэ ыытыллар. Билигин чугас баһаар 10 килэмиэтиргэ умайар. Эрдэ умулларбыт уоппут тыалтан саҥаттан күөдьүйдэ. Сирбит туорпалаах буолан умулларарга ыарахан, сир аннынан барар. От ыйын 22 күнүттэн бу үһүс баһаарбыт. Дэриэбинэ тулатынан 20-30 килэмиэтирдээх сиргэ баһаар баар. 5-6 булчут дьиэтэ, сылгыһыттар базалара умайда. Умуруоруллан баран күөдьүйбүт баһаарга эрдэ 64 киһи үлэлээбитэ. Билигин түүн баһаары утары охсуһар дьону бэлэмниибит. Үлэҕэ ДТ-75, Т-150, МТЗ уонна кыра тыраахтар туттуллар», — диэн нэһилиэк баһылыга Юрий Гуляев иһитиннэрбит.

СӨ баһылыгын уонна бырабыыталыстыбатын пресс-сулууспата иһитиннэрбитинэн, нэһилиэнньэлээх пууннарга куттал суоһаабат. Ойуур баһаардара “Якутлесресурс”, “Авиалесоохрана”, ЫБМ өрөспүүбүлүкэтээҕи салаатын, муниципальнай тэриллии уонна олохтоох дьон күүһүнэн умуруоруллаллар.