Бастаан утаа  сир сыһыаннаһыыларыгар, айылҕа баайыгар уонна экологияҕа сис кэмитиэт бэрэссэдээтэлэ Владимир Прокопьев  мунньах кыттыылаахтарын сир учаастагын түҥэтиигэ  баар кыһалҕаларга болҕомтону ууралларыгар туһаайда. Кини быһаарбытынан, Саха Өрөспүүбүлүкэтигэр  сир учаастагын үгүс баһыйар өттө  судаарыстыбаннай уонна муниципальнай бас билиигэ баар.

Владимир Прокопьев баар  сүрүн кыһалҕанан дьоҥҥо  түҥэтиллиэхтээх сир учаастага адьас тиийбэтин туһунан эттэ:  «Бу хайысхаҕа билиҥҥи сүрүн кыһалҕанан сир учаастага тиийбэтэ буолар.  Биллэрин курдук, Дьокуускай куоракка уонна улуустарга  сир учаастактара сайылык, даача хаһаайыстыбатын уонна оҕуруот олордорго аналлаах сир быһыытынан эрэ түҥэтиллиэхтэрин сөп». Ол иһин парламентарий  муниципальнай былаастар тыа хаһаайыстыбатыгар туһаныллар сирдэри сөптөөхтүк быһааралларыгар эттэ.  Санатар буоллахха, СӨ Сиргэ кодексатынан сир учаастагын сайылык хаһаайыстыбатын тэриниигэ, сылгыны иитиигэ, о.д.а. итиннэ майгынныыр хайысхаларга бэриллэллэр. Итини тэҥэ, учаастак  үстэн элбэх оҕолоох ыалларга, улахан инвестиционнай бырагырааманы олоххо киллэрэр   тэрилтэлэргэ уонна  бааһынай хаһаайыстыбанан дьарыктанааччыларга  көрүллэр.

СӨ  Баайга-дуолга уонна сир сыһыаннаһыыларыгар миниистирэ Павел Иванов дакылаатыгар федеральнай тустаах сокуоннарга  сөптөөх уларытыылары киллэрэр уолдьаспытын бэлиэтээтэ. «Нэһилиэнньэлээх пууннар кыраныыссаларын кэҥэтиигэ кыһалҕа баар. Ол курдук, 2013 сылтан  тутууга сыһыаннаах нуорма киириэҕиттэн нэһилиэнньэлээх пууннар сирдэрин биэрии генеральнай былааҥҥа сөптөөх уларыйыы оҥоһулуннаҕына эрэ сатанар кыахтаах.  Өрөспүүбүлүкэ сирин-уотун  82 %-нын ойуур пуондата ылар. Ол иһин  үгүс нэһилиэнньэлээх пууннар сирдэрин-уоттарын  ойуур пуондатыттан ылан кэҥэтэр эрэ кыахтаахтар. Билиҥҥи туругунан ойуур пуондатыттан сири кэҥэтэргэ  35 муниципалитет интэриэстээҕин биллэрдэ эрээри, ити боппуруос билигин аһаҕас турар», -- диэн миниистир быһааран биэрдэ. Ол иһин ити кыһалҕаны быһаарар инниттэн нэһилиэнньэлээх пууннар ойуур пуондатыттан учаастагы биэриини судургутутар боппуруос түргэнник быһаарыллыахтааҕын ыйдылар.  Павел Иванов Уһук Илиҥҥи гектарынан бэриллибит учаастактары инфраструктуранан хааччыйыы кыһалҕатыгар тохтоото. Ол курдук,  федеральнай сокуону олоххо киллэрии чэрчитинэн бэриллибит сирдэр  ойуур ортотугар мээнэ онон-манан бэриллибит буоланнар кэккэ ыарахаттары үөскэппиттэр. Маны быһаарар инниттэн ойуур пуондатыгар киирсэр сир нэһилиэнньэлээх пуун сиригэр-уотугар көһөрүллүөхтээх.  «Маны быһаарар инниттэн Уһук Илиҥҥи гектар федеральнай сокуоҥҥа уларытыыны киллэрэн,  ойуур пуондатын сирин нэһилиэнньэлээх пуун сиригэр судургутук  көһөрөр бэрээдэги киллэриэхпитин наада», -- диэн Павел Иванов эттэ.

Салгыы СӨ тутууга миниистирин солбуйааччы  Галина Новикова  чааһынай дьиэни тутуу уонна элбэх оҕолоох ыалларга  бэриллибит учаастактарга инфраструктараны оҥоруу  (гаас, уот ситимнэрэ) тустарынан иһитиннэрдэ.  2021 сыл муус устар 1 күнүнээҕи туругунан,  өрөспүүбүлүкэ үрдүнэн  үстэн элбэх оҕолоох 32 тыһ. дьиэ кэргэн баар. Мантан  25 тыһ. дьиэ кэргэнэ   учаастагы ыларга сайабылыанньаны биэрбиттэр.  Итинтэн 41 %-ра  учаастагынан хааччыллыбыт. Билиҥҥи туругунан,  6634 учаастакка уот ситимэ, 3200 учаастакка гаас ситимэ тиэрдиллибит уонна 4332 учаастак суола-ииһэ оҥоһуллубут. Өрөспүүбүлүкэ үрдүнэн инфраструктураны оҥорууга, ортотунан, 4 млрд. солк. көрүллүөн наада эбит.  Дакылаатчыттарга норуот дьокутааттара Антонина Григорьева, Владимир Чичигинаров, Алена Атласова, Евгений Кожухов, Виктор Губарев, Иван Данилов, Андрей Находкин, Валерий Лютый ыйытыылары биэрдилэр.

Владимир Прокопьев мунньаҕы түмүктүүрүгэр, өссө төгүл  судаарыстыбаннай уонна муниципальнай бас билиигэ баар  сир учаастактарын түҥэтиигэ баар кыһалҕаларга уонна  инфраструктуранан хааччыйыы боппуруоһугар болҕомто ууруллуохтааҕар эттэ. Парламент истиитин  түмүгүнэн  этиллибит кыһалҕалары быһаарыыга тустаах министиэристибэлэргэ эрэкэмэндээссийэлэр ылылыннылар.