Бүтүн Арассыыйатааҕы историческай диктант уопсастыбаннас, дьон-сэргэ болҕомтотун Аҕа дойду Улуу сэриитин суолтатыгар тардарга уонна историческай билиини-көрүүнү үрдэтэргэ туһуланар. Быйыл диктант РФ 85 эрэгийиэнигэр 7500 былаһааккаҕа ыытыллар. Ону сэргэ аахсыйаҕа 75 омук дойдута кыттыста.

2020 сылга тэрээһин Улуу Кыайыы 75 сылыгар уонна РФ Албан аат уонна Үйэтитии сылыгар ананар. Өрөспүүбүлүкэтээҕи аахсыйаны “Ил Түмэн” Судаарыстыбаннай Мунньаҕын дьокутаата, “Биир ньыгыл Арассыыйа” баартыйа “Историческай Өйдөбүл” бырайыагын салайааччыта Елена Голомарева сүрүннүүр.

Санатан эттэххэ, баҕалаахтар историческай диктаны онлайн көрүҥүнэн диктантпобеды.рф саайтка киирэн суруйуохтарын сөп. Ол гынан баран, маннык ньыманан суруйбут дьон түмүктэрэ уопсай ахсааҥҥа киирбэттэр, тоҕо диэтэххэ хоруйдары аан ситимтэн булуохтарын сөп.

Саха сиригэр тэрээһин күнүс 15 чаастан саҕаланар. Аахсыйа былаһааккалара 13 чаастан үлэлээн барыахтара.