– Былырыыҥҥы форумҥа Аартыка бэбиэскэтин уһулуччу соруктара чопчуламмыттара. Быйыл ити соруктар бүтүннүү Аартыка 2035 сылга диэри сайдыытын оҥкулугар киирдилэр. Мин былырыыҥҥы форумҥа кыттыбыт 700-чэкэ эспиэргэ махталбын биллэрэбин, – диэн Александр Крутиков тыл этиитигэр бэлиэтээтэ.

Миниистир солбуйааччыта сыл устата РФ Аартыкатын сирин-уотун иэнэ кэҥээбитин уонна 5 мөл. кв км тэҥнэспитин эттэ. “Бүгүн бу – көҥүл атыы-эргиэн улахан түһүлгэтэ. Эрэгийиэҥҥэ ханнык баҕарар биисинэс көрүҥэ нолуокка арааас чэпчэтиилэринэн уонна судаарыстыба өйөбүллэринэн туһанар кыахтаах. Ити барыта эрэгийиэн биир кэлим сайдыытын хааччыйар”, – диэтэ. Кини 2020 сылтан үлэлэрин саҕалаабыт бырайыактар инникитин тыһыынчанан саҥа тэрилтэлэр арыллалларыгар, үлэ миэстэлэрэ тахсалларыгар туһуланалларын санатта.  

– Аартыка биисинэһиттэн киирбит нолуок 50 %-на эрэгийиэн инфраструктуратын саҥардыыга ананар буолла. Ити сайдыы тэтимин өссө түргээтэтиэ. Холобур, аҥаардас быйыл Аартыка түөлбэтигэр үлэлэрин саҕалаабыт 33 инвестор 32 млрд солк. нолуок киллэрэрэ сабаҕаланар, – диэтэ Александр Крутиков.

Кини этэринэн, Аартыка сайдыытын биир сүрүн кыһалҕатынан – испэсэлиистэри бэлэмнээһин буолар. “Аартыкаҕа испэсэлиистэри бэлэмниир үөрэх систиэмэтин тосту уларытар уолдьаста. Үөрэх кыһаларын бүтэрээччилэр билиҥҥитэ үлэ миэстэлэрин 1/3 эрэ сабаллар”, – диэн эттэ.

Миниистир солбуйааччыта Арассыыйа Аартыка Сэбиэтигэр бэрэссэдээтэллииригэр номнуо бэлэм диэтэ. Ол курдук, эрэгийиэн сайдыытыгар чопчу этиилэри тута оҥоруон сөп диэн санаатын үллэһиннэ.