Көрсүһүү кэмигэр Аллараа Халыма улууһун баһылыга Валерий Сентяков 2013 сыллаахха ылыллыбыт 44-с №-дээх федеральнай сокуоҥҥа – “Судаарыстыбаннай уонна муниципальнай кыһалҕалары табаардарынан, үлэлэринэн уонна өҥөлөрүнэн хааччыйар хантыраак систиэмэтин” (“О контрактной системе в сфере закупок товаров, работ, услуг для обеспечения государственных и муниципальных нужд”) туһунан сокуоҥҥа уларытыылары киллэрэргэ этии киллэрдэ.

Валерий Сентяков бүддьүөт харчытын кэмчилииргэ уонна тырааныспар логистикатын ороскуотун аччатарга сокуонунан көрүллэр хааччаҕы 4 мөл. солк. диэри үрдэтэри туруоруста. Ол эбэтэр билиҥҥи федеральнай сокуонунан биир тэрилтэни кытта 2 мөл. солк. суума иһинэн табаарга, өҥөҕө эбэтэр үлэҕэ хантыраак түһэрсиэххэ сөп. Оттон Аартыка уонна хоту улуустарга табаары кыра кээмэйинэн хас да тэрилтэттэн атыылаһар олус ороскуоттаах.  

Баһылык биир тэрилтэттэн элбэх табаары атыыластахха, таһаҕаһы тиэрдиигэ биллэ үбү-харчыны кэмчилээһин тахсар диэн эттэ.

Маны таһынан, Валерий Сентяков хотугу аҕыйах ахсааннаах норуоттар босхо юридическай көмөнү ылалларын федеральнай таһымҥа сокуонунан бигэргэтиэххэ наада диэтэ. Кини билигин хотугу омуктар судаарыстыбаттан көрүллэр чэпчэтиилэр тустарынан ситэри билбэттэрин түмүгэр бэйэлэрин бырааптарын көмүскүүр кыахтара суох диэн бэлиэтээтэ. Онон идэтийбит юристар көмөлтөлөрүн судаарыстыба мэктиэлиэхтээх диэн эттэ.

Галина Данчикова Аллараа Халыма улууһун баһылыгын этиилэрин сүнньүнэн  салгыы Госдума сис кэмитиэттэрин кытта үлэлэһиэх буолла.

http://galinadanchikova.ru/ саайтан.