Улахан суолталаах мунньахха РФ Бэрэсидьиэнэ Владимир Путин кыттан, мустубут салайааччылары, дьокутааттары Арассыыйа парламентаризмын күнүнэн итиитик-истиҥник эҕэрдэлээтэ. «Бары таһымнаах дьокутааттарга, сенатордарга  биһиги дойдубутугар бастакы уочарат  национальнай интэриэстэр инники күөҥҥэ сылдьыахтара диэн эрэнэбин. Маннык хабааннаах түмсүү уонна үлэ Арассыыйа стратегическай суолталаах былааннарын, сыалларын олоххо киллэриигэ улахан төһүү күүһүнэн буолар», – диэн Владимир Владимирович эттэ. Владимин Путин Госдума уонна эрэгийиэннээҕи парламеннар сокуону оҥорууга былааннарын бииргэ тутан сүрүннээһин ыытыллыахтааҕын бэлиэтээтэ.    

Бэрэсидьиэн  Госдума дьокутааттарыгар Анал этиитэ эрэгийиэннэргэ быһачча сыһыаннааҕын, онтон сиэттэрэн, эрэгийиэннэр уонна муниципалитеттар үп өттүнэн бөҕөргүүллэригэр,  Арассыыйа территорияларын биир кэлим сайыннарыыга болҕомто ууруллуохтааҕын туһунан эттэ. Дьон олоҕор суолталаах улахан бырайыактары олоххо киллэриигэ бүддьүөт кирэдьиитэ бэриллиэхтээҕин туһунан тоһоҕолоон бэлиэтээтэ. Владимир Путин социальнай хабааннаах быһаарыылары, былааннары олоххо киллэриини (гражданнары, элбэх оҕолоох ыаллары өйүүргэ аналлаах) бэрэстэбиитэллээх былаас  улахан хонтуруолга тутан үлэлииригэр ыҥырда.  Кини этиитин түмүктүүрүгэр,  парламентарийдарга бары эппиэтинэһи чиэстээтик сүгэн үлэлии сылдьалларыгар ис сүрэҕиттэн махтанарын биллэрдэ уонна Арассыыйа саамай сүрүн бырааһынньыгынан – Улуу Кыайыы күнүнэн  итиитик-истиҥник эҕэрдэлээтэ.

Мунньахха кыттыыны ылбыт Ил Түмэн Бэрэссэдээтэлэ  Петр Гоголев былаас бары таһымын түмсүүтэ РФ Бэрэсидьиэнин Анал этиитин соруктарын, былааннарын олоххо киллэриигэ  төһүү күүһүнэн буоларын туһунан эттэ.  Петр Васильевич инстаграммыгар бу иннинэ Бэрэсидьиэҥҥэ ыйытыы биэрэр буоллахха, коронавирус дьаҥыттан сылтаан  мунньах ыытыллар пуормата уларыйбытын туһунан иһитиннэрбит.  «Кэлэр көрсүһүүнү үгэс буолбут көрүҥүнэн ыытыахтара диэн эрэнэбин уонна онно  Аҕа дойду Улуу сэриитин устуоруйатын үөрэтэргэ аналлаах судаарыстыбаннай хамыыһыйаны тэрийэр туһунан этиини киллэриэм. Биһиэхэ, сахаларга, биир  дойдулаахтарбыт  улахан  хорсун быыһыны оҥорбуттарын тилиннэриигэ, сөргүтүүгэ туруорсарбыт элбэх», – диэн спикер санаатын үллэстибит.

 Алтаай Өрөспүүбүлүкэтин парламеныгар саҥа талыллыбыт спикер Артур Павлович Кохоевтыын.