«Дойдубут дьоҕус куораттара инвестиционнай көмөҕө олус наадыйаллар. Онон судаарыстыба кинилэргэ инвестордар үлэлииллэригэр сөптөөх усулуобуйаны тэрийиэхтээх», -- диэн ыйбыт. Ити этиллибит ситиһиллибэтэҕинэ,  дьоҕус куораттартан дьон көспүтүн курдук көһө туруоҕун туһунан санаатын үллэстибит. Халыҥ үптээх инвестордар  дьоҕус куораттарга соччо-бачча харахтарын хатаабаттара чуолкай. Онон кинилэр үлэлииллэригэр сөптөөх усулуобуйа тэриллиэхтээҕин туһунан  Владимир Жириновскай ыйар.

«Дьоҕус куораттарга оробуочай үлэ миэстэлэрэ тиийбэт. Тоҕо оннугуй?  Инвестиция үгүс өттө улахан куораттарга эрэ кутуллар. Этэргэ дылы, төбөбүтүгэр Москва уонна Санкт-Петербург куораттар эрэ баалларын курдук санаа үөскээбит. Онон дьоҕус куораттар сайдалларын туһугар үбү-харчыны эмиэ биэриэххэ», -- диэн кини, били, хармаантан ылан бэриллиэхтээҕин туһунан бэрт судургутук эппит.  Дьэ, кини киһи Москва, Санкт-Петербург курдук куораттарга элбэх үп-харчы эргийэрин саҥа билбит буоллаҕа дуу? 

Соторутааҕыта  РФ Бэрэсидьиэнэ  Владимир Путин  РФ Госдуматын дьокутааттарыгар Анал этиитигэр «Дойду иннин диэки кимиилээхтик барара эрэгийиэннэр сайдыыларынан ситиһиллэр», -- диэн эппитэ. Эрэгийиэннэр уонна муниципалитеттар үп өттүнэн бөҕөргүүллэригэр,  Арассыыйа территорияларын биир кэлим сайыннарыыга болҕомто ууруллуохтааҕын, дьон олоҕор суолталаах улахан бырайыактары олоххо киллэриигэ бүддьүөт кирэдьиитэ бэриллиэхтээҕин туһунан тоһоҕолоон бэлиэтээбитэ.