Хаһаайыстыбалар салайааччылара А.П.Самсонов уонна С.В. Несмелов уотурба оҥорор сыаҕы, 200 т. бурдук харалла сытар ыскылаатын көрдөрдүлэр. Маны таһынан 240 сүөһү уонна 160 борооску турар ферматыгар сырыттылар. Ол кэннэ улуус дьаһалтатын дьиэтигэр Өлүөхүмэ улууһугар тыа хаһаайыстыбатын сайыннарыы боппуруостарыгар аналлаах мунньах буолла. Бырабыыталыстыба бэрэссэдээтэлэ Владимир Солодов, Ил Түмэн бэрэссэдээтэлэ Петр Гоголев, Ил Түмэн бэрэссэдээтэлин бастакы солбуйааччы Александр Жирков, улуус дьокутааттара, улуус тыатын хаһаайыстыбатын управлениетын специалистара, нэһилиэк баһылыктара, бааһынай хаһаайыстыбалар салайааччылара кытыннылар.
“Славянка” бааһынай хаһаайыстыбатын салайааччыта А.В.Кирсанов, “Абаҕа” оҥорон таһаарар кооператив салайааччыта И.В.Николаев үлэлэрин атахтыыр кыһалҕаларын туһунан этиннилэр.
Оройуон баһылыга Николай Николаевич Харбин тыа хаһаайыстыбатын салаатын сайыннарыыга кэлэр сылларга улахан болҕомто ууруллара былааннанарын кэпсээтэ. Ол инниттэн Дьокуускайы кытары сырыы сылы төгүрүччү тохтуо суохтааҕын эттэ. Тыа хаһаайыстыбатын бородууксуйатын киэҥ сиргэ илдьэн атыылааһын кыһалҕаларын бэлиэтээтэ.
Өлүөхүмэҕэ бастакытын бу курдук ситэриилээх уонна быыбарданар былаас салалтата кэлэн остуол тула олорон улуус тыатын хаһаайыстыбатын салаатыгар баар кыһалҕалары ырытыстылар, миэстэтигэр үлэлии сылдьар дьон санаатын иһиттилэр. Бу көрсүһүү улууска тыа хаһаайыстыбатын сайдарыгар көдьүүстээх буолуоҕар өлүөхүмэлэр эрэннэллэрин биллэрдилэр.
- 0
- 0
- 0
- 0
- 0
- 0