Норуот дьокутаата Евгений Кожухов электроэниэргийэ уонна ититии тарыыптарын сыаналарыгар тохтоото. Андрей Владимирович эниэргийэҕэ тарыыптар аһара үрдүк сыаналаахтарын кытта сөпсөстө. “Бэйэбит эниэргийэни оҥорорго уонна харыстаан туттарга үөрэниэхтээхпит. Ол инниттэн эниэргийэнэн хааччыйар тэрилтэлэр тэхиньиичэскэй базаларын саҥардыахтаахпыт, уларыта тутуохтаахпыт. Холобур, газогенерацияҕа көһүөххэ сөп. Итиннэ инвестор номнуо үлэлэһэргэ, 14 млрд солк угарга бэлэм. Итинник курдук экэниэмийэлиир миэрэлэри олоххо киллэрэн, тарыыптар сыаналарын түһэриэхпитин сөп”, – диэн хоруйдаата.

Норуот дьокутаата Валерий Лютый Дьокуускай сиригэр намыһах этээстээх дьиэни-уоту тутууга туох былааннааҕын ыйытта. “Ахсынньыга Саха сирин тутааччыларын сүбэ мунньаҕын былааннаатыбыт. Онно ити боппуруос көрүллүөҕэ. Хайдах бырайыактар олоххо киириэхтэрин сөбүн, Саха сиригэр ханнык тутуу матырыйааллара миэстэтигэр оҥоһуллалларын, о.д.а. тутууга сыһыаннаах түгэннэри дьүүллэһиэхпит. Саха Өрөспүүбүлүкэтигэр намыһах этээстээх олорор дьиэлэри тутуу хайаан да сайдыахтаах дии саныыбын”, – диэн Андрей Владимирович санаатын үллэһиннэ.

Норуот дьокутаата Олег Пустовой дьэллик ыттар кыһалҕаларын көтөхтө. Сүрүннээн, Нерюнгри куоракка буола турар быһыыны-майгыны санатта. “Быйыл өрөспүүбүлүкэ үрдүнэн 60 мөл. солк. көрүллүбүтэ. Онтон баара-суоҕа 4 мөл. солк. туһаҕа таҕыста. Дьэллик ыттар уонна бэйдиэ сылдьар кыыллар боппуруостарын быһаарыыны хайдах көрөҕүн?” – диэн ыйытта.

“Ити киһи ылла да биирдэ быһаарбат боппуруоһа. Онон бырабыыталыстыба комплекснай быһаарыныылары ылыахтаах”, – диэн бэлиэтээтэ.

Норуот дьокутаата Олег Пискунов сир баайын туһанааччылары кытта хайдах сыаһыаны олохтуур, бииргэ үлэлиир былааннааҕын туоһуласта. “Итиннэ биир бигэ санаалаахпын. Киһи сир баайынааҕар быдан улахан суолталаах буолуохтаах. Бастатан туран, кини интэриэстэрэ, олорор сирэ-уота көмүскэниэхтээхтэр. Онон, сир баайын туһанааччылары кытта ити бириинсиптэргэ олоҕуран үлэлиир былааннаахпын”, – диэн хоруйдаата.

Норуот дьокутаата Мария Христофорова коронавируһунан ыалдьан баран үтүөрбүт аҕа саастаах дьон доруобуйаларын чөлүгэр түһэрэллэригэр уонна хааччахтааһын кэмигэр уһун үйэлэниини өйүүргэ инникитин туох дьаһаллар былааннаммыттарын чуолкайдаста.

“Өрөспүүбүлүкэ доруобуйаҕа туһалаах араас минеральнай туустарынан, бадарааннарынан баай эрээри, доруобуйаны чөлүгэр түһэрэр үчүгэй кииннэрэ суох. Холобур, “Якуткурорт” моҥкуруоттаабыта. Онон ити хайысха, биллэн турар, олус мөлтөх туруктаах. Инньэ гынан, испэсэлиистэри үөрэтэ сылдьабыт. Араас бырайыактар, этиилэр киирэллэр. Бэйэбит эмтиир уонна доруобуйаны чөлүгэр түһэрэр кииннэрбитин сөргүтүөхпүтүн наада”, – диэн бэлиэтээтэ.

Норуот дьокутаата Юрий Григорьев: “Өрөспүүбүлүкэ бүддьүөтэ сарбылла турар. Ханнык хайысхалар үбүлээһиҥҥэ тиксибэттэрий? Хамнас кэмигэр кэлэ туруо дуо?” – диэн ыйытта.

“Хамнаска хойутааһын суох буолуо. Билигин федеральнай бүддьүөттэн эбии үп-харчы кэлэрин күүтэбит. Ол кэллэҕинэ итэҕэстик үбүлэммит хайысхалары ситэри толорон биэриэхпит. Онон 2021 сылы этэҥҥэ туоруурга туох саарбахтааһын суох. Өрөспүүбүлүкэ сайдыыта, былааннаммытын курдук, салгыы салҕанан бара туруо”, – диэн хоруйдаата.

Санатан эттэххэ, Андрей Тарасенко кистэлэҥ куоластааһын түмүгүнэн дуоһунаһыгар бигэргэниэхтээх.

Онон матырыйаал салгыыта бэчээттэниэ.