Ил Түмэн Бэрэссэдээтэлэ Петр Гоголев мунньахха 55 дьокутаат кыттарынан кворум  туолбутун туһунан билиһиннэрэн туран,  уочарата суох XXIII  пленарнай мунньаҕы саҕалаата. Маҥнайгынан көрүллүбүт боппуруос урбаанньыттарга сыһыаннаах буолла. «СӨ  нолуогун сокуонугар» уларытыылары киллэриини көрдүлэр. Бу киллэриини СӨ Ил Дархана Айсен Николаев  көҕүлээбит. Сүрүн дакылааты СӨ экэниэмикэҕэ миниистирэ Майя Данилова оҥордо. Кини  2021 сыл тохсунньу 1 күнүттэн биир кэлим  дохуот нолуога (ЕНВД)  суох буоларын туһунан иһитиннэрдэ. Бу нолуок 1998 сыллаахха биисинэһи хонтуруоллуурга диэн киллэриллибитэ. Майя Данилова быһаарбытынан урбаанньыттар 2021 сыл ахсынньы 21 күнүгэр диэри нолуогу хайдах төлүүр эрэсиими талыахтаахтар. Ол быһыытынан кинилэр судургутутуллубут систиэмэ төлөбүрүгэр киириэхтэрин  (УСН), оттон биирдиилээн предпринимателлэр (ИП) патеннаах нолуок төлөбүрүн систиэмэтин (ПСН) талыахтарын эмиэ сөп.   Итини тэҥэ, урбаанньыттар  кэккэ усулуобуйалары  ылынар буоллахтарына, профессиональнай диэн дохуоту туһанар толору бырааптаахтар. Экэниэмикэ миниистирэ бэлиэтииринэн,  холобур,  Дьокуускай куоракка олох-дьаһах, бытовой өҥөлөрү оҥоруунан, тимир көлөнү өрөмүөннүүрүнэн дьарыктанар   урбаанньыттар биир кэлим дохуот нолуогуттан (ЕНВД) судургутуллубут систиэмэҕэ көһөр түгэннэригэр  кэлэр сылга нолуоктара 3 төгүл үрдүөхтээх этэ. Итини тэҥэ, биирдиилээн атыынан дьарыктанааччылар киэннэрэ 6, оттон  таһаҕас тиэйээччилэргэ 7 төгүл улаатыахтаах.  Ол иһин, СӨ Ил Дархана Айсен Николаев  быһаччы сорудаҕынан,  урбаанньыттар нолуоктара кэлэр сылтан эмискэ үрдээн ноҕоруусканы оҥорботун диэн сыалтан  нолуок ставкатын кыччатар сокуон  бырайыагын  бэлэмнээбиттэр.

Норуот дьокутааттарыттан  Павел Ксенофонтов  уонна Иван Данилов сокуоҥҥа киириэхтээх  уларытыыларга анаан ыйытыылары биэрдилэр. Иван Данилов  урбаанньыттар  нолуогу саҥа систиэмэнэн төлөөтөхтөрүнэ,  муниципальнай тэриллиилэр бүддьүөттэригэр   төһө үп киириэн сөбүн ыйыппытыгар, миниистир Майя Данилова, быһа барыллаан ааҕыынан, ортотунан,   160 мөл. солк.  киириэхтээҕин туһунан эттэ. Дьокутаат Гаврил Парахин   ситэриилээх былаас  ити боппуруоска сөптөөх быһаарыыны биэрбэтэҕин туһунан кириитикэлээтэ уонна   федеральнай уорганнары кытта  нолуок ставкатын уларытыыга  ыкса ситимнээхтик үлэлииллэригэр ыйда. Саха сирин урбаанньыттара тыйыс усулуобуйаҕа үлэлииллэрэ хайаан да учуоттаныллыахтаахтар диэн сөптөөх санааны эттэ. Ил Түмэн урбааҥҥа, туризмҥа уонна  инфраструктураны сайыннарыыга сис кэмитиэтин бэрэссэдээтэлэ Юрий Григорьев  сокуон бырайыагын  өйүүрүн эттэ.  Дьокутааттар сокуон бырайыагын бастакы ааҕыыга ылыннылар.