Кини урбаанньыт бурҕалдьытын сүгүөҕүттэн дьоҥҥо-сэргэҕэ элбэҕи көмөлөһөн кэллэ: спортсменнарга, эмтэнэ барааччыларга, атын да кыһалҕалаах дьоҥҥо. Ону сэргэ Руслан Еремеевич Амматын улууһугар социальнай эбийиэктэр тутуллууларыгар, тыа хаһаайыстыбатын тэрилтэлэригэр улахан өйөбүлү оҥорор. 

“Үтүө үтүөнэн эргиллэр” диэн кынаттаах этии баар. Руслан Еремеевич тус бэйэ иннин эрэ көрүнэн олорор буолбакка,  дойдутун дьонугар кыһаллар.  Ол да иһин кини аатыгар мэлдьи махтал тыллара этиллэллэр. Дэлэҕэ кини хас эмэ нэһилиэк Бочуоттаах гражданина буолуо үһү дуо?

“Киһи хаһан баҕарар киһитинэн хаалыахтаах дии саныыбын. Ханнык баҕарар ыарахаттары дьон түмүстэҕинэ кыайар. Онон дьоҥҥо үтүөнү эрэ баҕаран олоруохтаахпыт. Тоҕо диэтэххэ, олох  биирдэ эрэ бэриллэр күндү бэлэх буолар. Ол олоххор аатыҥ үтүөнэн эрэ ахтылларын курдук дьоһуннук олорорго кыһаллыахтааххын. Ону хас биирдии киһи өйдүөхтээх. Миэхэ дьон кыһалҕалаах кэллэҕинэ, хайаатар да истэбин уонна туох кыалларынан көмөлөһө сатыыбын. Дьон бары оннук буолуохтаах. Көмө улахан да, кыра да диэн арахсыа суохтаах. Этэллэр дии:  "Киһиэхэ кып-кыра да наада", -- диэн. Кырдьык оннук. Ыарахан кэмҥэ киһиэхэ кыра да көмө оҥоһулуннаҕына, ол киниэхэ өйөбүл буолар, санаатын көтөҕөр. Онон, мин санаабар, үтүөнү оҥоруу хас биирдии киһиттэн тахсыахтаах. Оччоҕо биһиги олохпут сырдык уонна ыраас буолуоҕа”, - диэн этэр Руслан Еремеевич, Амма улууһун бочуоттаах мецената.

"Амма олоҕо" хаһыаттан