Видео-кэмпириэнсийэ көрүҥүнэн ыытыллыбыт мунньахха Хонтуруоллуур кэмитиэт чилиэттэрэ, норуот дьокутааттара Владимир Чичигинаров, Андрей Николаев, Владимир Богданов, Ньургуйаана Захарова, Иннокентий Романов, Валерий Лютый, Олег Пустовой, Ил Түмэн аппараатын үлэһиттэрэ кытыннылар.

Мунньах саҕаланыытыгар “Саха Өрөспүүбүлүкэтигэр 2020 сылга сокуону оҥоруу туруга” диэн дакылааты көрдүлэр. Хонтуруоллуур кэмитиэт бэрэссэдээтэлэ Евгений Перфильев докумуон ис хоһоонугар коронавируһу утары охсуһуу уонна экэниэмикэ өйөбүлүн боппуруостара киирбиттэрин иһитиннэрдэ.

Былырыын пленарнай мунньахха Ил Түмэн үлэтин быйылгы Регламена бигэргэммитэ. Норуот дьокутааттара онно киириэхтээх барыллаан бырагыраама уларытыыларын кытта билистилэр. Ол курдук, Евгений Перфильев иһитиннэриитинэн, парламент быйылгы бырагырааматыгар РФ Бэрэсидьиэнин Федеральнай Мунньахха Анал этиитигэр олоҕуран, үс сокуон барыла, алта “бырабыыталыстыба чааһа”, үс “төгүрүк остуол”, биир парламентскай истии уонна Иркутскай уобалас Сокуону Оҥорор Мунньаҕын сир сыһыаннаһыыларыгар, айылҕа баайыгар уонна экологияҕа сис кэмитиэтин кытта кыттыгас тэрээһин эбии киирэн биэрбиттэр.

Евгений Перфильев норуот дьокутааттарыттан ситэтэ суох үлэлиир сокуоннары үөрэтэн баран, Хонтуруоллуур кэмитиэккэ тустаах этиилэри оҥорон киллэрэллэригэр көрдөстө. Холобур, өрөспүүбүүлүкэҕэ сир баайын туһаныыга эппиэтинэс туһунан сокуону хаттаан көрүүгэ этии киирбитин эттэ.

Ил Түмэн пресс-сулууспатын матырыйаалынан.