Антон Васильев Ыччат парламенын үлэтин-хамнаһын сырдатта. Ол курдук, улуустар дьокутааттарын Сэбиэттэрин иһинэн ыччат палаталарын тэрийии бырайыагын кытта билиһиннэрдэ.  

“Ыччат палатата – улуустарга Ыччат парламеныгар дьүөрэлии уорган буолуохтаах. Бу уорган олохтоох ыччаты уопсастыбаннай уонна социальнай суолталаах боппуруостары быһаарыыга түмүөхтээх”, – диэн парламент бэрэссэдээтэлэ кэпсээтэ.

Интервью кэмигэр сэһэргэһээччилэр “Саха сирин ыччатын туох долгутар?” диэн ыйытыкка тустаах хоруйдары көрдөөтүлэр. Антон Васильев санаатынан, күн бүгүн ыччат үлэтэ суоҕа саамай сүрүн сытыы кыһалҕа.

“Эдэр исписэлиистэр үлэ кыайан булбаттар. Ити эдэр дьоҥҥо саамай сытыы кыһалҕа. Бу кыһалҕа социальнай-экэнэмиичэскэй сайдыыга быһаччы дьайар. Билигин ыччат – инникигэ эрэлбит эрэ буолбатах, кини – өрөспүүбүлүкэбит уонна дойдубут билиҥҥитэ”, – диэн Антон Васильев сиэрдээхтик бэлиэтээтэ.

Эдэр парламентарий санаатынан, улуустарга ыччат палаталарын тэрийдэххэ, элбэх кыһалҕалар быһаарыллар кыахтаахтар.  

“Билиҥҥи кыһалҕалары барытын тута ылбыччы быһаарар уустук. Ол гынан баран, бастакы хардыылары оҥорор син биир наада. Саҥа үөрэхтэрин бүтэрбит оҕолор социальнай өттүнэн өйөбүллээх буолуохтаахтар. Холобур, үлэҕэ ылыы критерийдэрин сымнатыахха, оттон үөрэхтэрин быыһыгар үлэлиир оҕолорго имигэс үлэ кыраапыгын олохтуохха баара. Уопута суох үлэҕэ ылыы – тутаах боппуруос. Онон ыччаты бэйэлэрин бырааптарын билэллэригэр уонна көмүскүүллэригэр үөрэтиэхтээхпит. Мин санаабар, ыччат палатата улуустарга олохтоох ыччаты түмэн, элбэх кыһалҕалары дьүүллэһэр уонна быһаарар кыахтаах”, – диэн Ыччат парламенын бэрэссэдээтэлэ санаатын үллэһиннэ.

Билигин Саха сирин улуустарыгар ыччат палаталарын тэрийии үлэлэрэ баран эрэллэр. Күн бүгүн ыччаттар көҕүлээһиннэрин Нам уонна Чурапчы улуустарын дьокутааттарын Сэбиэттэрэ өйөөтүлэр.