Издательский дом Редакция Подписка
Погода в Якутске: . -19 oC
КУРС ЦБ: $ 71,53 | 82,83

Ил Түмэн оҕо аймахха уонна дьиэ кэргэҥҥэ сис кэмитиэтин бэрэссэдээтэлин солбуйааччы, норуот дьокутаата Оксана Михайлова видео-кэмпэриэнсийэ эрэсииминэн Өлүөхүмэ улууһугар турбут ойуур баһаардарын умуруоруу үлэтин туһунан мунньах ыытта.

Ил Түмэн оҕо аймахха уонна дьиэ кэргэҥҥэ сис кэмитиэтин бэрэссэдээтэлин солбуйааччы, норуот дьокутаата Оксана Михайлова видео-кэмпэриэнсийэ эрэсииминэн Өлүөхүмэ улууһугар турбут ойуур баһаардарын умуруоруу үлэтин туһунан мунньах ыытта.

«Өрөспүүбүлүкэбит улуустарыгар турбут ойуур баһаардара былаас бары таһымын бэрэстэбиитэллэрэ уонна олохтоох салайыныы уорганнара улахан бэлмнээх буолалларын ирдиир. Өрөспүүбүлүкэтээҕи суһал ыстаап биллэрбитинэн, Өлүөхүмэ улууһугар билигин “Ми-8” бөртөлүөт үлэлиир, нэһилиэнньэлээх пууннарга уот суоһаабат. Ол эрээри ардаҕа суох чаҕылханнар оҕустахтарына, баар балаһыанньа тута уларыйыан сөп», -- диэн Оксана Михайлова эттэ.

Өлүөхүмэ улууһун олохтоохторо буруо хойдон иһэриттэн уонна Чапаев нэһилиэгин таһыгар турбут баһаар ньиэп ситимигэр чугаһаабытыттан куттанан, норуот дьокутаатыгар сурук ыыппыттар. Оксана Тагировна бу боппуруостары иһитиннэрбитин кэнниттэн, Өлүөхүмэ улууһун баһылыга Николай Харбин улуус сиригэр-уотугар турбут баһаар балаһыанньатын билиһиннэрдэ.

Кини эппитинэн, Өлүөхүмэ улууһун сиригэр 8 тыһ. га сиринэн тарҕаммыт икки ойуур баһаарын умуруораллар. Онно “Авиалесохрана” 20 үлэһитэ уонна “Якутлесресурс” 8 үлэһитэ кыталлар. «Биһиги күнүн аайы сирбитигэр-уоппутугар эбии баһаар турбутун быһаарар, кэтиир үлэлэри ыытабыт. Өрөспүүбүлүкэтээҕи суһал ыстаабы кытары ыкса сибээстэһэ олоробут. Соторутааҕыта түспүт ардах абыраата, сорох баһаардарбытын умулларда. Ол курдук, Русская Речка уонна Чапаев нэһилиэктэрин таһыгар умайар сорох баһаардары умуруорбуппут. Биһиги бөртөлүөтүнэн сылдьан хонтуруоллуур сирбитигэр турбут баһаардар сүрүннээн улуус арҕаа өттүгэр турбуттар», -- диэн улуус баһылыга кэпсээтэ.

Оттон норуот дьокутаата Оксана Михайлова ыйыппыт дьон дьаарханар боппуруоһугар Николай Харбин: «Нэһилиэнньэлээх пууннарга уот суоһаабат, ньиэп ситимигэр уот чугаһаабат, атын да социальнай-экэнэмиичэскэй эбийиэктэр ойуур баһаарыттан эмсэҕэлиир кутталлара суох», -- диэн эппиэттээтэ.

СӨ экологияҕа, айылҕаны туһаныыга уонна ойуур хаһаайыстыбатын харыстабылын департаменын салайааччыта Владимир Иванов өрөспүүбүлүкэ үрдүнэн ойуур баһаарын умуруорууга ыытыллар үлэ туһунан кэпсээтэ.

Дьокутаат Оксана Михайлова олохтоох дьон баһаары умуруорууга туруммуттарын, улахан көмө буолалларын бэлиэтээбитигэр, Владимир Иванов торфалаах баһаардарга сөптөөх бэлэмэ суох олохтоох дьону тардар кутталлааҕын туһунан эттэ.

Өлүөхүмэ улууһун ойуур хаһаайыстыбатын салайааччытын солбуйааччы Геннадий Хисамутдинов ыраах сытар уонна сир анныгар умайа сытар (почвенный) баһаардар 85 уонна 86 нүөмэрдээх учаастактарга бэлиэтэнэллэрин кэпсээтэ. Кини бу сирдэргэ олохтоох нэһилиэнньэттэн дьону ыҥырар куталлааҕын, тустаах бэлэмнээх исписэлиистэр наадаларын бэлиэтээтэ. «50 киһи эбии наада. Мастары, талахтары кэрдэн, дьону сөмөлүөтүнэн түһэрэр былаһааккалары бэлэмниэххэ наада», -- диэтэ.

456921 1

Оксана Михайлова улууска олохтоох нэһилиэнньэттэн төһө дьон үлэлии сылдьарын уонна кинилэргэ төлөбүр көрүллүүтүн боппуруоһа хайдах быһаарылларын туһунан ыйытта. Улуус баһылыга Николай Харбин кэпсээбитинэн, ойуур баһаара турбут кэмиттэн уопсайа олохтоох нэһилиэнньэттэн 117 киһи бэйэлэрин баҕаларын үлэлээбиттэр. Кинилэргэ 1200 тыһ. суумаҕа төлөбүр көрүллүөхтээҕин быһаарбыттар. «Олохтоох нэһилиэнньэ ойуур баһаардарын умуруорууга олус көмөлөстө. Холобур Саҕынньахтаах таһыгар чаҕылхантан үөскээбит баһаары тута умулларбыттара , бэлэм олорбут буоланнар, буруо көстөөтүн кытта хомунан тахсан, уот улаата илигинэ хам баттаабыттара», -- диэн баһылык кэпсээтэ.

Николай Харбин өссө биир кыһалҕаны ыйда. «Өлүөхүмэ улууһун сирэ-уота олус киэҥ сиринэн тэнийэн сытар. Өрөспүүбүлүкэҕэ киэҥ сирдээх улууһунан буолабыт. Ол иһин биир күн иһигэр көтөр аалынан сирбитин барытын кэрийэр кыахпыт суох, онон баһаар турбут туочукаларын туһунан иһитиннэрии улуус дьаһалтатыгар хойутаан кэлиэн сөп», -- диэтэ.

Ил Түмэн дьокутаата Оксана Михайлова Өлүөхүмэ улууһугар ыраах сытар сирдэри көтөр аалынан кэтэбили ыытарга эбии көмө уонна торфалаах баһаардары умуруорарга бэлэмнээх исписэлиистэр наадаларын бэлиэтээтэ.

«Ойуур баһаардарын баҕа өттүнэн олохтоох нэһилиэнньэттэн кыттар дьон көмөтүнэн эрэ умуруорар кыахпыт суох. Билигин от кэмэ саҕаланна, сүөһүлээх дьон бары отторугар тахсыахтара», -- диэтэ дьокутаат.

Оттон баҕа өттүнэн ойуур баһаарын умуруорсубут дьоҥҥо төлөбүр олус бытааннык оҥоһулларын, ол барыта докумуон Москванан эргийэриттэн тутулуктанарын эттэ. Холобур, билиҥҥи туругунан ыам ыйыгар үлэлээбит дьон төлөбүрдэрин алтынньыга эрэ ылар балаһыанньалаахтар. «Олохтоох дьаһалта төлөбүрү көрүүгэ ирдэнэр докумуоннары олох ымпыгар-чымпыгар диэри үчүгэйдик оҥороргут наада. Мин бу боппуруоһу хонтуруолга ылыам», -- диэтэ.

«Кылаабынайа, ойуур баһаардарын нэһилиэктэргэ киллэрбэтибит. Улуус дьаһалтата, тустаах үлэһиттэр кэмигэр үлэ ыытаннар. Олохтоох дьаһалта үрдүк бэлэмнээҕин уонна баһаардары хонтуруолга тутан олорорун көрдүбүт-иһиттибит. Бүгүҥҥү мунньах түмүгүнэн мин улууска уустук балаһыанньа турбатаҕын көрдүм, баар кыһалҕалары быһаарыахпыт», -- диэн норуот дьокутаата мунньаҕы түмүктээтэ

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
ПОДЕЛИТЬСЯ СТАТЬЕЙ