Михаил Никифоров Ил Дархан Айсен Николаев быйыл от ыйын 24 күнүнээҕи ЫйааҕынанСӨ Бырабыыталыстыбатын бэрэссэдээтэлин солбуйааччы эбээһинэһин толорооччунан анаммыта. Кини улуус да, өрөспүүбүлүкэ да таһымнарыгар үлэлээбит баай уопуттаах: Сунтаар улууһун баһылыга (2000-2007 сс.), СӨ Бэрэсидьиэнин уонна бырабыыталыстыбатын дьаһалтатын олохтоох салайыныы боппуруостарыгар департаменын салайааччы (2007-2010 сс.), СӨ Баайга-дуолга уонна сир сыһыаннаһыыларыгар миниистирин солбуйааччы (2010-2020 сс.).

М.В. Никифоров саҥа үлэтигэр тыа сирин уонна тыа хаһаайыстыбатын сайыннарыыны, хотугу төрүт салаалары, балыктааһыны уонна бултааһыны, урбааны уонна туризмы, эргиэн үлэтин, уопсастыбаннай аһылыгы, бэтэринээрийэни сүрүннээһин киирэллэр. Кэлин муода буолбут Аартыканы уонна өрөспүүбүлүкэ хоту эҥээрин сайыннарыы эмиэ киниэхэ сүктэриллэр.

Маҥнай Михаил Викторович бу үлэлээбит кылгас кэмигэр үөскээбит көрүүтүн, толкуйун дьокутааттарга билиһиннэрдэ. Ол кэнниттэн сис кэмитиэттэр чилиэннэрэ ыйыталастылар, чуолкайдастылар уонна түмүккэ сэтинньи 10 күнүгэр Ил Түмэн мунньаҕар көрүллүөхтээх Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы дуоһунаһыгар М.В. Никифоров кандидатуратын мэктиэлииргэ куоластааһын тэриллибитигэр икки туттуммут дьокутааттан ураты бары өйүүллэрин биллэрдилэр.