Издательский дом Редакция Подписка
Погода в Якутске: . 26 oC
КУРС ЦБ: $ 72,86 | 88,65

Саха сирин баһылыга Айсен Николаев бу иннинэ коронавирус тарҕаныытын утары дьаһалларга анаан олохтоммут кэккэ хааччахтааһыннары уһулар ыйаахха илии баттаата. Ону сэргэ кини муус устар 15 күнүттэн 30 күнүгэр диэри өрөспүүбүлүкэ сиригэр-уотугар муниципалитеттар икки ардыларыгар таксилар сырыыларын тохтотто.

Саха сирин баһылыга Айсен Николаев бу иннинэ коронавирус тарҕаныытын утары дьаһалларга анаан олохтоммут кэккэ хааччахтааһыннары уһулар ыйаахха илии баттаата. Ону сэргэ кини муус устар 15 күнүттэн 30 күнүгэр диэри өрөспүүбүлүкэ сиригэр-уотугар муниципалитеттар икки ардыларыгар таксилар сырыыларын тохтотто.

Саха сирин ыраах сытар, киһи тиийэригэр ыарахаттардаах нэһилиэнньэлээх пууннарыгар бүгүҥҥү күҥҥэ диэри коронавирус сыстыганнаах ыарыыта бэлиэтэнэ илик, онон ити сирдэргэ олохтоохтор сымнатыыны ылар буоллулар.

Ыйаах быһыытынан, Саха сирин сылы эргиччи тырааныспарынан сибээстэһии суох 169 нэһилиэнньэлээх пуунугар 2020 сыл муус устар 15 күнүттэн 30 күнүгэр диэри Ил Дархан култуура дьиэлэрин, култуура-сынньалаҥы тэрийэр тэрилтэлэрин, киинэ театрдарын, киинэ саалаларын, спорт-сынньалаҥ тэрилтэлэрин, онтон да атын аралдьытар уонна сынньатар тэрилтэлэр, банкеттыыр саалалар үлэлэрин тохтоторго сорудахтаата. Онтон атын үлэ бу нэһилиэнньэлээх пууннарга көҥүллэниэҕэ.

Тэрилтэлэр уонна чааһынай предпринимателлэр үлэлэрин хааччахтааһыҥҥа сорох дьаһаллар маннык сирдэргэ олохтоннулар: Булуҥ улууһун Тиксии бөһүөлэгэр, эбии хааччахтыыр дьаһаллар киллэриллибит муниципальнай тэриллиилэр сирдэригэр-уоттарыгар (Дьокуускай куорат, Жатай, Аллараа Бэстээх бөһүөлэгэ, Алдан, Ленскэй, Мииринэй уонна Нерюнгри оройуоннара), ону сэргэ тиийэргэ ыарахаттардаах миэстэлэр кэрискэлэригэр киирбэт атын муниципальнай тэриллиилэргэ.

Айсен Николаев копия

Итини таһынан, Айсен Николаев 2020 сыл муус устар 15-тэн 30 күнүгэр диэри легковой таксиларынан, М1 (пассажирдары тиэйиигэ туһаныллар уонна суоппар миэстэтиттэн ураты, 8-тан ордуга суох олорор миэстэлээх легковой массыыналар) уонна М2 (пассажирдары тиэйиигэ туһаныллар, суоппар миэстэтиттэн ураты 8-тан ордук олорор миэстэлээх, техническэй өттүнэн маассалара муҥутаан 5 тоннаны аһарбат тырааныспар) категориялаах автобустарынан пассажирдары тиэйэр тырааныспар көрүҥнэрэ айанныылларын тохтотто. Маннык таксистар Саха сирин нэһилиэнньэлээх пууннарын икки ардыларыгар федеральнай, регионнааҕы уонна олохтоох суолталаах массыына суолларынан айанныахтара суоҕа.

Бу саҥа илии баттаммыт докумуон дойду Президенэ Владимир Путин 239 №-дээх ыйааҕын олоххо киллэрэр аналлаах. Ити ыйааҕынан Россия Федерациятын сиригэр-уотугар саҥа коронавирус сыстыганнаах ыарыыта (COVID-19) тарҕаммытынан сибээстээн нэһилиэнньэ санитарнай-эпидемиологическай өттүнэн этэҥҥэ буолуутун хааччыйыыга анаан 2020 сыл муус устар 4-30 күннэригэр, үлэһиттэр хамнастарын хаалларан туран, үлэлээбэт күннэр олохтоммуттара. Эмиэ ити ыйааҕынан регионнарга санитарнай-эпидемиологическай быһыыны-майгыны учуоттаан, коронавируһу утары охсуһууга губернатордар бырааптара кэҥэтиллибитэ. Онон субъектар баһылыктара ханнык баҕарар тэрилтэни сабар уонна дьон эрэ буолбакка, тырааныспар сырыытын хааччахтыыр быраабы ылбыттара.

Муус устар 15 күнүгэр үгэс быһыытынан брифинг кэмигэр Айсен Николаев бэлиэтээбитинэн, кини ыйааҕар олоҕуран бары нэһилиэнньэлээх пууннар усулуобунайдык 3 бөлөххө арахсаллар:

Бастакы бөлөххө толору хааччахтааһыннар киллэриллибит бөдөҥ муниципальнай тэриллиилэр – Дьокуускай, Жатай, Аллараа Бэстээх, Алдан, Ленскэй, Мииринэй уонна Нерюнгри оройуоннара, ону сэргэ Тиксии бааллар.

Ил Дархан быһаарбытынан, бу сирдэргэ тэрилтэлэр уонна предпринимателлэр үлэлэригэр хааччахтааһыннар оннунан хааллылар, ол эрээри сорох сымнатыылар бааллар. Холобур, лицензиялаах медицинскэй тэрилтэлэр уонна туспа дьиэҕэ олохсуйбут идэтийбит маҕаһыыннар үлэлэригэр. Ол эрээри бу тэрилтэлэргэ барыларыгар Роспотребнадзор ирдэбиллэрэ булгуччу толоруллуохтаахтар. Онон кинилэргэ бэрэбиэркэлэр ыытыллыахтара, кэһии баар буоллаҕына, сабыллыахтара итиэннэ салгыы үлэлииллэрэ тохтотуллуон сөп.

Иккис бөлөх – киһи тиийэригэр ыарахаттардаах нэһилиэнньэлээх пууннар. Номнуо билигин ити сирдэргэ кыһыҥҥы суол сабыллан, тырааныспар сырыыта хааччахтанна.

«Туһааннааҕынан, бу сүнньүнэн Арктикатааҕы нэһилиэнньэлээх пууннарга, сынньалаҥ, спорт тэрээһиннэрин уонна уопсастыбаннас улахан мунньахтарын кытта сибээстээх үлэлэртэн ураты, тэрилтэлэр үлэлэрэ сөргүтүлүннэ», – диэн өрөспүүбүлүкэ баһылыга иһитиннэрдэ.

Үһүс бөлөх – Саха сирин киин өттүнээҕи, өрүс уҥуордааҕы уонна Бүлүү бөлөх  оройуоннара. Итилэргэ эргиэн тэрилтэлэрин, аччыгый уонна орто бизнес тэрилтэлэрин үлэлэрин режимигэр туһааннаах сымнатыылар оҥоһуллаллар.

Саха сирин баһылыга хааччахтааһыннары, дьиэҕэ олоруу режимин, уопсастыбаннай сирдэргэ тутта-хапта сылдьыыны кытаанахтык тутуһар наадалааҕын өссө төгүл бэлиэтээтэ.

СӨ Ил Дарханын 2020 сыл муус устар 14 күнүнээҕи 1119 №-дээх Ыйааҕын толору СӨ официальнай иһитиннэрэр сайтыгар билсиэххэ сөп. Итини таһынан ыйаахха сылы эргиччи массыынанан сибээстэһии суох нэһилиэнньэлээх пууннар кэрискэлэрэ баар.

СӨ Ил Дарханын уонна Бырабыыталыстыбатын пресс-сулууспатын матырыйаалларынан.

Мария Васильева хаартыскаҕа түһэриитэ

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
ПОДЕЛИТЬСЯ СТАТЬЕЙ