Бу бэртээхэй бачыымы Саха сирин сайыннарар Корпорация көҕүлээтэ.  Бырагыраамаҕа «Якутия» авиахампаанньа, ТЦТР, «Якутский хлебокомбинат», «Сахабулт», АГИКИ, ФАПК «Якутия», «Сэйбиэм», о.д.а. тэрилтэлэр кыттарга сайаапка биэрдилэр. Хамаандалар бизнеһи, маркетины, бренд-менеджмени сайыннарыыга Арассыыйаҕа биллэр экспертэргэ үөрэниэхтэрэ. Куратордара– Андрей Пуртов, Ломоносов аатынан МГУ преподавателэ.

 "Биир ньыгыл Арассыыйа" баартыйа Саха сиринээҕи салаатын сэкирэтээрэ Айсен Николаев кыттааччыларга туһаайан бу курдук эттэ:

  --Эһиги уникальнай  бырагыраама бастакы айанньыттара буолаҕыт. Бу айаҥҥыт ситиһиигэ сирдиэҕэ, хампаанньаҕыт үүнэригэр-сайдарыгар тирэх, аан дойду ырыынагар тахсарыгар далаһа буолуоҕа. Эрэнэбин, уопуттаах уһуйааччылар үөрэтиилэрэ, сүбэлэрэ-амалара, хамаандалар бэйэҕит дьулуургут көдьүүстээх түмүгү көрдөрүөҕэ диэн. Билигин "несырьевой экспорт" диэни сайыннарыахтаахпыт. Ол аата бэйэбит олохтоох оҥорон таһаарар хампаанньаларбыт бородууксуйаларын аан дойду ырыынагар таһааран, төрөөбүт өрөспүүбүлүкэбитигэр туһалыахтаахпыт. Онуоха судаарыстыба көмө-тирэх буолуоҕа. Саха сирин иһинэн эрэ сылдьан сайдыбаппыт, улахан дохуоту ылбаппыт. Онон тас экэниэмикэ дьиссипилиинэтигэр үөрэнэр уолдьаста".

 Бырагыраама куратора Андрей Пуртов  Саха сирэ сырье өттүнэн баайын уонна ону туһаҕа таһаарарга базалааҕын бэлиэтээтэ. "Онон креатив, билии, күүстээх каадыр экэниэмикэтин түстүүр кыах баар. Биһигини уһун кэмнээх "супер-интенсивнэй" үөрэх күүтэр. Үөрэх диэн табаар буолбатах, бу -- сервис. Ити сервиһи олохтуурга эһиги бэйэҕит сорҕоҕутун -- талааҥҥытын, сатабылгытын, сүрэххитин, кыаххытын -- биэрэн туран дьарыктаныахтааххыт. Оччоҕо эрэ сервиһи толору баһылыаххыт. Төһө элбэх энергияҕатын, толкуйгутун, баҕа санааҕытын бу бырагыраамаҕа биэрэҕит, соччонон элбэх билиини ылан бараҕыт. Ол ылбыт билиигитин тута хампаанньаҕыт сайдыытыгар туһулаан, туһанан иһиэххит", -- диир куратор.  

   Тэрийээччилэр этэллэринэн, бырагыраама 6 модультан турар. 2021 с. олунньутугар диэри маркетиҥҥа, бренд-менеджмеҥҥэ уһуйуллуохтара, хампаанньаларыгар маркетинговай стратегияны толкуйдуохтара.