Докумуон бэс ыйын 5 күнүттэн атырдьах ыйын 31 күнүгэр диэри гречкэни, гречкэттэн оҥоһуллубут бурдугу, гречкэлээх курууппалары дойду таһыгар таһааран атыылыыры хааччахтаабыт.
Ааспыт нэдиэлэҕэ РФ Тыатын хаһаайыстыбатын министиэристибэтэ Арассыыйа ырыынагар гречкэ сыанатын хонтуруоллуур туһуттан курууппаны дойду таһыгар таһааран атыылыыры быстах кэмҥэ тохтотор туһунан этии оҥорбута.
Министиэристибэ этэринэн, дойду иһигэр оҥоһуллар гречкэлээх бородууксуйа Арассыыйаҕа бэйэтигэр эрэ нэһиилэ тиийэр. Онон быйыл РФ Тыатын хаһаайыстыбатын министиэристибэтэ гречкэ үүннэрэр бааһыналарын кэҥэтэр былааннаах.
Росстат дааннайынан, быйыл Арассыыйаҕа гречкэ сыаната 25,1 % үрдээбит, ол эбэтэр ортотунан 76,75 солк.-тан 96 солк. диэри эбиллибит.
Былырыын ахсынньы ыйга бородуукта сыаната аһара үүнэ-тэһиинэ суох үрдээн, сыананы хонтуруоллуур дьаһаллар ылыллыбыттара. Холобур, саахарга уонна мас арыытыгар сыананы күн бүгүнүгэр диэри хам баттаан олороллор. Ол курдук, саахар кууһунан сыаната 36 солк., киилэнэн сыаната 46 солк., мас арыыта – 95 солк. уонна 110 солк. үрдүө суохтаахтар.
-
0
-
0
-
0
-
0
-
0
-
0
