Ил Түмэн дьокутаата Елена Голомарева аҕыйах ахсааннаах  төрүт  норуоттарга судаарыстыбаннай өйөбүлү көрөр сокуоннар бырайыактара оҥоһуллан, көрүүгэ сылдьалларын туһунан федеральнай таһымҥа иһитиннэрдэ.

  «Соторутааҕыта Арктика эргимтэтигэр урбааҥҥа судаарыстыбаннай өйөбүл туһунан федеральнай сокуон тахсыбыта. Бу сокуоҥҥа Саха сирин быһаччы көҕүлээһининэн, итиэннэ РФ Бэрэсидьиэнигэр Уһук Илин уокурукка боломуочуйалаах вице-премьер Юрий Трутнев  өйөбүлүнэн аҕыйах ахсааннаах төрүт норуоттарга сыһыаннаах түһүмэх баар буолла. Хотугу аҕыйах ахсааннаах норуоттар бэрэстэбиитэллэрэ бу олус наадалаах сокуон тахсарыгар кыттыыны ылан, сир баайын туһаҕа таһаарааччылар уонна аҕыйах ахсааннаах олохтоох төрүт норуоттар бииргэ алтыһыыларыгар  социальнай эппиэтинэс стандартара үөскүүрүгэр олук уурдулар», – диэн  Елена Голомарева бэлиэтээтэ.

 Кини этэринэн, сотору кэминэн аҕыйах ахсааннаах төрүт норуоттарга социальнай-экэнэмиичэскэй өттүнэн сайдалларыгар саҥа бырагыраама баар буолуоҕа. Тустаах бырагырааманы  оҥорууга РФ Арктика эргимтэтигэр баар субъектара бары кыттыыны ылбыттара.

 Дьокутаат Виктор Губарев кэккэ этиилэрин иһитиннэрдэ:

 --Хотугу аҕыйах ахсааннаах норуоттар бырааптарын көмүскүүртэн тохтоон,  аны кинилэр олорор сирдэрин-уоттарын бигэтик сайыннарыыга ылсан  үлэлиэххэ. Билиҥҥи туругунан ити өттүгэр элбэх кыһалҕалар  бааллар. Олортон сорох чааһын судаарыстыба ылыстаҕына эрэ быһаарыллар кыахтаах. Холобур, хотугу аҕыйах ахсааннаах норуоттар олохторун укулаатынан буолбут хаһаайыстыбаннай боппуруостарга ханнык да хааччахтааһын суох буолуохтаах. Ол курдук, балыктааһын итиннэ бастакы уочарытынан көрүллүөхтээх. Аны туран, Арктика эргимтэтигэр  сир баайын хостуох иннинэ этнологическай бэрэбиэркэ хайаан да ыытыллыахтааҕын модьуйар федеральнай сокуон тахсыахтаах.

 Онлайн-кэмпириэнсийэҕэ Александр Акимов, Александр Крутиков уонна Александр Пилясов хотугу аҕыйах ахсааннаах төрүт норуоттар  боппуруостарыгар бэйэлэрин санааларын эттилэр.